Julie Andrews-in Gaga a fak

Lady Gaga-in The Sound of Music hla thla ruk chhung a zir

Oscars show-ah khan Lady Gaga chuan classical musical film hlawhtling, The Sound of Music hla zawmkhawmin a sa a, kha kha he film-a a changtunu Julie Andrews chuan ropui a ti a, Gaga hi a fak hle.

Stage-a Gaga-in Sound of Music hla a sak zawh khan Julie Andrews chuan Gaga hi a kuah a, a hlim hmel hle a nih kha. "Academy thuneituten The Sound of Music puala tribute an siam kha ka lawm a, ka thinlung a khawih hle a, chu bakah Lady Gaga performance khan nasa takin khawih bawk a ni," a ti. "Gaga ngaisangtute zinga mi ka ni ṭhin a, mahse tunah chuan kan inpawhna a ṭha ta sawt a, ṭhian kan ni ta," a ti.
Lady Gaga hi a inbuatsaih nasa hle a, The Sound of Music perform tur hian thla ruk chhung zet a inbuatsaih. Oscar show-a a zai tur pual liau liau hian thla ruk chhung chu aw sawizawi leh zai lama mi thiam, coach a ruai a, a lo inzir tawh a, nitin The Sound of Music a perform tur hian, a zin chhuah lai pawhin zai a zir ziah ṭhin!
The Sound of Music hian kum 50 a tling ta a, chumi pual chuan Academy thuneitute hian tribute hi an buatsaih a ni. Julie Andrews hian a vanglai a hre chhuak nasa hle dawn a, a lung a leng ngawt ang.
He film hi kum 1965-a tihchhuah kha a ni a, Julie Andrews hi Maria lemah a chang a, Indopui II laia thil thleng, chhungkaw pakhata naupang enkawltu, a hnua chhungkaw pa ber pathlawi nena innei ta film a ni. Christopher Plummer chu a changtupa ber niin, Capt. Von Trapp lemah a chang.
Oscars-ah a ropui hle a, category 10-ah ngawt nominate a ni a, panga a la. A lakte hi Best Picture, Best Director, Best Sound Mixing, Best Film Editing leh Best Music te an ni.