Patricia Arquette thusawiin mipui a ṭhen

Oscar-a Best Supporting Actress a dawn ṭuma a thusawi avangin mipui ngaihdan a phir hle. Patricia Arquette hian a acceptance speech-ah hlawh inang tlang leh hmeichhia leh mipate dikna inang tlang chungchang a sawi a ni.

Hmeichhe dinhmun chawikan leh mipate nena dinhmun inang chungchang a sawi chhuah hi critics ṭhenkhat chuan an ngai thei lo zawk mah a, heng critics-te ngaihdan chuan heta hmeichhia a sawi hi mingo hmeichhiate bik nia ngaih theihin a sawi a, vun rawng dang hmeichhia leh patilte dinhmun erawh a kawk lo niin an ngai.

Hetianga an sawisel chhunzawm chungchang hi Patricia hian chhang lêtin, "Hlawh inangtlang a awm theih nana i bei a nih chuan hmeichhiate zawng zawng a huam ngei tih i hria ang. Vun rawng dang hmeichhiate hlawh hi a tlem zawk zel a ni tih pawh i hria. Eng hmeichhiate hi nge hlawh bi thua thliar hran nasat ber han ring chhin teh? Mihâng hmeichhiate an ni i ti ngei ang," tiin a thusawi hian vun ngo hmeichhiate chauh a huam lo a, thliar hran nasat ber mihang hmeichhiate a huap nasa zual niin a sawi a ni.

"Retheihna khura khawsa naupang tam berte chhungkua, an chhungkaw enkawltu leh an innghahna chu hmeichhia an ni a, pa emaw, mipa awm lohna a ni...Khawvel hmun hrang hrangah hmeichhiate dinhmun chawikân a nih a, mipate nen dinhmun intluka an awm theih nan kan kal chhuak a, thu kan sawi ṭhin. America-ah ngei pawh hian hmeichhiate hian mipate nen dikna inang tlang kan nei lo. A chhan chu maw, kan Constitution vang a ni a, kan Constitution hi hmeichhiate tana siam a ni lo a ni," a ti.