Lalrinṭhai hla thar a hnai Rapper YoungP nen an thawkdun
Kum 10 chuang liam ta, cable TV lama 'demand channel' lar hunlai vela 'I Her Ta Maw' tih hla hmanga Zoram mipuite thiam taka min lo awi tawh ṭhintu Lalrinṭhai Renthlei(Nutei) chuan hla thar 'Duhlai Mama' a tichhuak dawn a, he hlaah hian rapper YoungP nen an thawkdun a ni.
Nutei leh YoungP-te hian an hla thar tur hi music video pawh an peihfel vek tawh a, MDM library lamah pawh dahluh ni tawhin Zonet Cable TV lamah thlira ngaithlak theihin a awm thuai dawn a, YouTube lamah pawh kan hmu har lo ang.
'Duhlai Mama' hi Lalthanpuii phuah a ni a, video leh recording hi Elden production kut chhuak niin YoungP nena an thawhdun dan aṭang hian a music genre tur chu a hriat theih mai awm e. Hip Hop lamhawi a ni dawn a, "Hmeichhiain mipa duh deuh a neih lamhawi hla a ni," tiin Lalrinṭhai hian a hla thar chungchang hi Vanglaini a hrilh.
Hla thar a ni lo a, Youth Icon 2007 Malsawmtluangi sak kha mi tam tak chuan kan hre tawhin a rinawm, mahse kan hriat ṭhin ang khan Nutei leh YoungP hian min rawn hlui dawn lo a, a style a dang dawn hle a nih hmel. Tunlai ṭhalai mil zawkin an rawn thar thawh leh dawn a ni.
Lalrinṭhai hian kum tam tak chhung hla thar a neih tawh loh hnuah nikum khan 'Ṭap Chunga Min Thlahna' tih hla a tichhuak a, hemi hnu hian reh leh deuh vang vangin hei kum chawhnu lamah hla thar Zoram mipuite min hlui leh dawn a ni a, Nutei zai lo ngaina tawh ṭhin tan chuan a nghahhlelhawm tawh hle ang.