American Sniper tak tak thattu dam chhung a tâng dawn
Christopher Scot Kyle hi i hre lo a nih pawhin blockbuster movie American Sniper hi chu i hre ngei ang. He film, American Sniper hi US Navy SEAL, Chris Kyle-a chanchin a ni. Kyle hi kahhlum a ni a, a case hi tunkar khan an tifel ta chiah.
Box office movie hlawhtling, American Sniper film-a a chanchin an tihlan ber, Kyle-a thattu chu Texas court chuan thiam loh a chantir a, damchhunga tâng tura hremin, a tan chhungin parole-in a chhuak thei lo ang.
American Sniper hi US Navy SEAL, sniper hlawhtling leh silai kapthiam em em, Kyle chanchin a ni. Kyle hi February 2013 khan Texas-a Fort Worth-ah Eddie Ray Routh chuan Kyle-a ṭhianpa, Chad Littlefield nen a kaphlum a ni.
Routh, kum 27 mi hian Kyle leh a ṭhianpa, Littlefield te hi a lambun a, an hnung lam aṭangin a kaphlum a ni. Kyle hi Texas State Cemetery, Austin khuaah phum a ni a, he thlanmuala thlan tlawh hlawh ber a ni.
Sniper-hoin harsatna an tawh ṭhin chu rilru lama harsatna a ni. Kyle hi a tir chuan ranch nei ṭhin a ni a, chumi hnuah US Navy SEAL-ah a lut a, sniper a ni a, a kap thiam hle. Sipai aṭanga a bân hnuin rilru lamah harsatna nasa tak a tawk a, sipai bâng dangte
ṭanpuina a dil a, an pui ṭhin. Amah thattu Rough nen pawh hian an inhre hle.
Rough-a ukil chuan Rough hian rilru lama harsatna leh buaina a tawk a, Kyle te pawh hi amah thah tuma rawn veh nia hriain chutiang chuan a hmu tlat a, amah inven nan tiin silai hi a hmetpuak ta a ni, tiin court-ah hian a ṭanna thu leh, nunrawn vang leh huat vang hrim hrima that a ni lo tiin a sawi a ni.
Prosecutor chuan Kyle leh a ṭhianpa, Littlefield te hi silai mu 12 aṭanga 13 velin a fuh niin a sawi. Littlefield-a makpa, Jerry Richardson chuan Rough hnenah hian, "Mi huaisen pahnih nunna i la a, heng mite hi nangmah kawmngeih tum em em an ni. Tunah chuan nang hi American-te chuan a chhe zawngin an hria che nga, an ngaina ngai lo ang che," a ti.
Chris Kyle
American sniper history-a hlauhawm ber chu Chris Kyle hi a ni a, kum 1974-ah piangin, kum 2013 February 2 khan kahhlum a ni. Iraq-ah period li (4) chhung a awm. A kahhlum zat finfiah theih hi mi 160 an ni a, firfiak pawl an ni. Kum 2009 khan sipai aṭangin a bâng a, a hnuah sipai dangte silai kah a zirtir ṭhin. Kum 2012 khan a chanchin lehkhabua ziah, American Sniper chu tih chhuah a ni a, hralh a kal hle. Chu lehkhabu behchhan chuan film an siam leh a ni a, a hlawhtling hle a, sawizui a hlawh a, fak pawh a hlawh hle.