Box Office : "Deadpool & Wolverine" a la ropui zel

"Deadpool & Wolverine" chuan a kar hnihna atan North American box office-ah ro a la rel chhunzawm zel a, USD mtd 97 lak luh belhin, USD mtd 395.5 a la lut tling tawh. Khavel huapa a sum hmuh USD mtd 824.1 a tling tawh bawk a, kumina film chhuak zinga sum la lut tam ber dawttu ni tawhin, R-rated film zingah "Joker" leh "Oppenheimer" chiah a pha tawh lo a ni.

Marvel film 34-na, Ryan Reynolds leh Hugh Jackman-te channa hian kar hnih chhungin a installment hmasa, USD mtd 783 la luttu "Deadpool" leh USD mtd 786 la luttu, "Deadpool 2" te a rawn khum nghal der a, MCU film hlawhtling ber zinga mi niin USD tld 1a hmuh chhuah theih ngei beisei a ni. MCU hian USD tld la lut thei film hi 10 a nei tawh a, "Avengers : Infinity War" kha la lut tam ber niin USD tld 2.799 a la lut thei a ni. Marvel Studios President Kevin Feige chuan "Deadpool & Wolverine" sum lak luh nen, MCU sum hmuh chhuah hi USD tld 30 chuang a tling tawh tih a sawi.

"Twisters" chu a kar thumnaah pahnihnaah la awm chhunzawm zelin USD mtd 22.7 a hmuh chhuah belh leh a, tlangzarh thar M.Night Shyamalam thriller, "Trap" chuan USD mtd 15.6 la lutin pathumnaah a lang ve bawk. "Despicable Me 4" leh "Inside Out 2" te chu Top 5-ah an la awm zui zel a, USD mtd 11.3 leh USD mtd 6.7 an la lak luh belh leh.

"Deadpool & Wolverine" leh "Inside Out 2" hlawhtlinna hi Hollywood pawhin hlawkpuiin, July thla chhunga box office sum hmuh hi USD tld 1 a tling thei a, hei hi July, 2023 hnua thla khata an sum lak luh tam ber ṭum a ni pha a ni.