Zaithiam Sawmtea'n CM Discretionary Fund-ah Rs nuai 2.125 a hlan

Mizo gospel artist lar, Sawmtea Chhangte chuan US-a concert a neih aṭanga a sum hmuh, Rs 212,500 chu nimin khan Chief Minister Discretionary Fund atan a hlan.

Chief Minister Discretionary Fund atana sum hlan hi US-a Sawmtea a cham chhunga Evan Mang Cung Nung (Sailo Pa) leh Thong Thluai (Sailo Nu) te hmalaknaa kohhran pahnih, Detroit Chin Emmanuel Churh leh Nebraska Chin Baptist Churh, Omaha-a concert an neih aṭanga an hmuh chhuah a ni. Sailo Pa leh Sailo Nu hi US-a Mizo zaithiam kalte lo buaipuitu ber an ni ṭhin. Chief Minister Lalduhoma hnena sum a hlannaah hian C. Dinthanga'n a ṭawiawm.

Sawmtea hi Chin National Day-a zai tura sawm a nih angin, kumin February 14 khan US hi a pan a, thusawi leh zaia rawngbawlna nei tura sawmna hrang hrang dawng zuiin, state 20 chuangah rawng a bawl a, August 5 khan Mizoramah a rawn kir leh thei chauh a ni. Thla 5 chhung chu tlang mi unau Hakha, Falam, Tiddim, Zomi unaute zingah kar khat mah awl loin rawng a zu bawl a ni. September thla hian zaia rawngbawlna nei tura sawm a nih angin Australia-ah a zin leh dawn a, hei bakah kumin November leh nakkum May thla atan US-a rawng bawl turin sawmna a dawng tawh bawk.

Sawmtea Chhangte hian nikuma US a tlawh ṭum khan Mizo Society of America nena ṭangkawpin concert an buatsaih bawk a, heta ṭanga an sum hmuh, Rs nuai 5 chuang chu Myanmar leh Manipur-a Zohnahthlakte pualin CYMA hnenah a lo hlan tawh bawk a ni.