Zendaya leh Pattinson te chang dun dawn

Hollywood hot star pahnih, Zendaya Coleman leh Robert Pattinson-te chu A24 romantic thriller, 'The Drama' ah an chang dun dawn.

"The Drama" hi "Dream Scenario" hlawhtlinpuitu, filmmaker Kristoffer Borgli-a'n a buaipui dawn a, a plot hi sawichhuah la ni lo mah se, romantic story, a changtute an inneih dawn hma nia an beisei loh dan leh maksak taka thil thleng chungchang a ni dawn a ni. A production A24 lamin an buaipui dawn a, Square Peg nen an thawhdun an chhunzawm leh dawn a ni. A24 leh Square Peg hian "Hereditary", "Midsommer" leh "Dream Scenario" an lo ti chhuak tawh a, hei bakah hian chhuah tur hmabak, Paul Rudd leh Jenna Ortega channa, "Death of a Unicorn" leh, Jaoquin Phoenix, Pedro Pascal leh Emma Stone-te channa "Eddington" an nei bawk.