Fashion Fiesta. Rainy Days

June thla kan chuan kai aṭang kha chuan ruahtui a tamin, khawchin hriatthiam a har chho viau zel mai a, zing lama khua a ṭhat viau changin chawhnu lamah ruahpui vanawnin min nan leh chiam mai ṭhin bawk si a. Chutiangin, zingkarah hna leh school kal dawn vel­ah te ruahin min dan chang lah a tam. A sur a, khua a ṭha leh a; hei hi chu thuhran, inchei dan mawlh mai hi hriatthiam a harin inchei thiam pawh a har hle a ni. Mi tam zawk chu hrilh kan ngai lo mai thei. Amaherawhchu, kan hun tawn ten a zir bawka tlem azawng kan thailang poh aniang chu.

Rawng hlui thei lo, a tu a te pawhina kan inhmeh theih, a dum leh a var, fashion ṭawng taka Classic black and white kan tih mai hi khaw chin hriat lohah chuan a him ang reng phian a, thli leh khaw vawt laka venghim tur chein Trench Coat dal da lampang, a lema mi ang hian, chutah Loafers simple leh bun nuam huh pawh han rahpui ngam tur nen inbel kawpin inchei dan chi khatna ni ta se.

Khawi hmun, eng hmunah pawh hian thawmhnaw dum hak hi chu a him ber fo a, a bikin ṭhalai deuhte tan a lema kan hmuh ang hian kawrfual dum leh Boot rawng sang, chawn khuh emaw mal lai chen bunin a chungah Overcoat, Leather Jacket, Denim Jacket emaw Cardi fual te nen hak pawlhin incheina tunlai deuh si ruahtui laka him ṭha tak bawk si a ni. Kawrfual dum kher lo pawh a par emaw a rang pawh nise a pawi miah lo.

Kan ṭhalaiten inchei an thiam sawtin khawthlang ramte angin hak ngam loh pawh an ngah ta vak bik lo. A lema mi ang hian khaw chhungah pawnfen chhing arh tei leh Kamis ṭialte inbelin thliin pawnfen a chhem parh laka veng turin leggings emaw tights hak thuahin, Boot Chunky Heel sang lutuk lo ngal chen te nen bun pawlh la a nalh dangdai ngawt ang.

Ruah a tlak deuh hlek hi chuan thil huh rahpui bawrh bawrh theih tur bun chhuah hi a ṭha mai ṭhin a, Sneakers leh Slip On te kekawr tlawn pangngai nen inbelpuiin, kawrlum pan deuh hlek, ban tlawnte nen ha kawp ila a awlsam phian. Khua a lo ṭhat leh viau pawn hmuh hrehawm a ni hranpa lo.

Kan Jeans kekawr ngainat tak kha kan ha chhuak duh anih pawhin a tlang thleh hnih vela thlep chho≠in, kawng diak leh chiau huh tena kan kekawr tlang a tihhnawn chuap loh nan thil ṭangkai tak pakhat niin incheina tunlai tak a ni tho bawk a ni.

Zingkar aṭanga ruah a tlak a, chhum a lo zin chuai hi chuan hna kal, class kal, chhuah vah hrim hrim hi a chakawm loh nghal ngawt mai zel a, inchei pawh a phurawm loh ṭhin avangin rawng thim lam hi kan inbel tlangpui ṭhin. Chu chu mi nawlpui tihdan ṭhin anih avangin tlema dangdai duh tan colour popping rawng lar tak T-Shirt emaw Scarf emaw Bag emaw inbelpuiin Leather kekawr tlawn zuih nen han ti deuh
ṭah mai la i langsar nalh mai ang.

Skinny Jeans, Rubber rain boots, kawr colourful lam scarf ṭial mawi tak leh nihliap langsar tak, a lema mi ang hian han inbel chhin la, i langsarin, khua a chhe viau e ti lo chuan mi mit ila nghal zar mai ang.

A hmei apa tan kan thawmhnaw simple deuh tilangsar turin kan pheikhawk bun Sneakers a ni emaw boots a ni emaw rain boots pawh nise langsar tak, mit la nghal zar kha han inbel chhuak phawt mai la, kawrlum fual te nen, khua a lo ṭhat leh tak pawha han phelh mai theih turin a chhungah T-Shirt pangngai tawp te hak thuahin, fur ruahtui tlak laia inchei dan ṭha tak pakhat a ni.

Tluangpuii Hmar

Instructress, Vakiria Institute of Fashion Technology