Raymond Hmanlai an chang mai ang maw?

Zonet Ṭhazual Lengzem chart-a dinhmun sang tak a hauh a hauh hnuah a thawm a reh vang vang a, tunah a rawn kir leh ta. Raymond Lalhriatpuia Hnamte chuan music video thar a siam leh tawh a, he hla hmang hian a hmaa chart-a a lo hauh tawhte hauh leh ngei a tum ang.

Youth Icon 2012 aṭanga kan hmelhriat ṭan, Raymond-a hian kum 2013 khan a music video hmasa ber 'Ka bâng si lo' tih chu a rawn tichhuak a, ngaihthlak a hlawh viau. Chumi hnuah 'Eng dang ka dâwn thei lo' tih hla a rawn tichhuak leh a, a hlawhtling a, Ṭhazual chart-ah pawh kan hmu kan hmu a, thlan hlawh berte zinga mi a ni. Tunah 'Hmanlai chang tur' tih hla a rawn nei thar leh a, lengzem khawvelah chuan hlawhtling tur zinga mi a ni ngei ang.

'Hmanlai chang tur' hi contemporary jazz music lam daih a ni a, he hla hi thu leh hla lama hnuhma tam tak lo nie tawh, Thartei Siakeng (Thartei Jonapuia Siakeng) phuah a ni. He hla hi hmangaihnain a tihnatte dinhmun sawina a ni a, a hla thu belhchian a dawl hle. Video hi RDS (Mawitea) kutchhuak a ni a, video hi story awma siam a ni a, hei hi Masi-a Chhakchhuak idea leh ruahman a ni thung. Kima Chhangte (Home Free Studio)-in a music lam a siam a, Foster-a an record a ni.

Raymond-a hla hmasaho hi lengzem tluangtlam tak a ni a, tuna mi erawh chu Mizote lunglenna leh tuipui, kan kalsan theih loh, leihkapui zai a ni. Hmana leihkapui zai kan hriat ang chiah chiah erawh a ni dawn lo a, fusion a awm a, creativity a awm a, music lamah chuan contemporary jazz music a ni. Mizo leihkapui zai pangngai bo chuang si lo, chu zai leh contemporary jazz music inchhunfin hi a ngaihnawm dangdai riau.