Fashion Fiesta
Oscar Red Carpet Fashion
Khawvelin a ngaihhlut leh a ngaihsan Oscars sem a ni a, show ṭan tak tak hmaa Red Carpet an kaihpharhah milar tak takte an rawn inlan a ni. Khata an thawmhnaw inbel kha a naran lo a, a satliah lo hle a, khawvel designer lar ber berte intihsiakna tual zawl a ni a, stylist ten an thiam an inchhuahsiakna hmun a ni.
Red carpet-a thuamhnaw an rawn hak chhuah kha a man a to hlawm hle a, mi naran tan chuan neih phak chi pawh a ni lo, chuvang chuan company tam tak chuan khatiang ang kha a hmanraw chhe zawka hmangin an siam chhuak a, an hralh leh ṭhin a, an hralh thei hle ṭhin.
Tun ṭum Oscar red carpet-a Lupita Nyongo'o gown hak, Francisco Costa gown, Calvin Klein kha a turu hle a, Akoya pearl hrang hrang 6000 zeta cheimawi a ni a, USD 150,000 man vel a ni. Nilaini zing lam khan London-a a thlenna hotel aṭangin an la ruksak zui.
Cate Blanchett hi nikum khan khawvelin Oscar red carpet-a a thawmhnaw hak an ngaihven em em a, hemi kum, kum 2014 Oscars-a red carpet-a thuamhnaw an hak chhuah tawh zinga man to ber rawn ha chhuakin, a thuamhnaw kha Armani kutchhuak a ni a, USD mtd 18.1 man a ni. Kuminah erawh chuan khatiang em ema man to kha a rawn ha chhuak tawh lo a, John Galliano Maison Margiela a rawn inbel.
Julianne Moore gown hak kha a man a to ang tih a lang reng. Chanel Haute Couture gown a rawn ha chhuak a, Karl Lagerfeld-a design a ni. Mi 27 ten darkar 987 chhunga an ṭhui zawh a ni. Haute Couture a nih chuan a anpui an siam tawh lo ang tih rin ve mai tur. Kha gown-ah khan sequin (thil bial te tak te te) 80,000 zet an ṭhui bet a, an cheimawi a ni.
Julianne Moore gown ai chuan Lady Gaga gown kha a siam a la hautak leh zawk. Lady Gaga hian Azzedine Alaia ball gown a rawn ha chhuak a, kha gown kha siam zo turin mi 25 ten rim takin darkar 1600 an ṭhui a ni. Mahse, thlengsilna kutkawr ni awm tak a rawn bun chhuah khan a fashion a rawn ti-bam leh thung!
Tlereuh an rawn inbel chhuah pawh hi a man a neu lo satliah a ni lo a, a to em em vek mai. Nicole Kidman-in tlereuh a rawn inbel kha a man a to hle. Harry Winston tlereuh a rawn inbel chhuak a, a ngûn bunah khan lunghlu, carat 82 zet a awm tel a, USD mtd7.2 zeta to a ni. Rita Ora khan Lorraine Schwartz piece a rawn inbel thung a, lunghlu carat 40-a tama cheimawi a ni. Hei bakah hian Victorian inspired diamond bengbeh a rawn behah khan champagne diamond, carat 25 zet a awm bawk a, USD mtd7.5 vel man a ni.
Dakota Johnson tan tun Oscar red carpet kha Oscar bika a vawi khat telna a ni a, a rawn chhe lo hle. Khatah khan Forevermark bengbeh a beh a, kha kha USD mtd2.2 man a ni. Jennifer Lopez pawhin Neil Lane jewellery a rawn inbel chhuak a, a bengbeh kha lunghlu carat 20 zeta chei a ni a, a zungbun, lunghlu leh platinum kha USD mtd2.5 man a ni.
Red carpet-a milartena an hak tur hi designer leh fashion company, jewellery company-ten ha turin an ngen a, an thlansak a, pawisa an hlawhtir ṭhin. A hatu a lar poh leh hak tur thlan tur a ngah tihna a ni a, last minute-ah pawh duhthlang thei an ni. Brand tam tak chuan an thuamhnawte ha turin a sawmin an sawm ṭhin a ni.
BAFTA-ah khan sana siamtu lian Raymond Weil chuan Charlize Theron chu an sana bun turin an thlem a, a bun a, sana a bun manah Raymond Weil hian Theron hi USD mtd3 zet an pe. Red carpet-ah mai ni lo vantlang puipunna hmunah pawh bun turin an duh a ni.
Hei mai bakah incheina lam tichhuaktute hian an thilsiam tilar turin milarte hi inremna an siampui a, an advertisement-ah tilang kher lo mah se, red carpet-a an thilsiamte inbel chhuak turin inremna an siampui ṭhin. Jessica Chastain chu Geneva-a mi Piaget chuan tunhnai khan an brand-te tilar turin inremna an siampui a, an advertising campaign-ah a inlan lo ang a, red carpet-ah erawh an tlereuh siamte a inbel chhuak ṭhin dawn a ni.
Tluangpuii Hmar
Instructress, VIFT