Islam firfiakte beih hlauhthawnna avangin Vienna-a Eras Tour neih tur ṭhulh a ni

Taylor Swift chuan Eras Tour a neih meka Austria khawpui, Vienna-a concert vawi thum a neih tur chu Islam firfiakten beih an tum nia rinhlelhna a awm avangin a ṭhulh.

Vienna-ah hian August 6, 7 leh 10 hian Ernst Happel Stadium-ah concert hi neih tura ruahman a ni a, mahse Nilaini khan he stadium beih dan tur ruahman nia rinhlelh mi pahnih man an ni a, hemi hnu hian concert neih tur pawh hi ṭhulh a nih thu organiser lam chuan chawpchilh takin an puang zui ve nghal a ni. Thuchhuah siamin, "Sorkar official lamin firfiakten Ernst Happel Stadium beih an tum tih an nemngheh tak avangin, mitinte himna turin show neih tur pawh hi ṭhulh a ngai ta a ni," an ti. Ticket lo lei tawhte pawh ni 10 chhungin refund vek an nih tur thu an sawi.

Vienna police hotu, Gerhard Pürstl chuan concert-ah hian ṭum khatah mi 65,000 vel zel kal tur anga chhut an nih thu leh, concert-na pawn lamah mi 22,000 vel zet awm tur anga chhut a nih thu a sawi.

Islamist firfiakte hian a hma pawhin concert neihna hmun hi an lo bei tawh a, kum 2015 November thla khan Paris-a Bataclan Theatre beiin mi 130 an thi a, May 2017-ah Manchester, England-a Ariana Grande concert neihna hmun chu thihchilh bomb hmangin an lo bei tawh bawk a, mi 22 in an thihphah a ni.