Zurich Film Festival-ah Kate Winslet chawimawi dawn

Oscar winning British actress, Kate Winslet chu 20th Zurich Film Festival-ah chawimawi a ni dawn a, Golden Icon Award hlan a ni ang.

20th Zurich Film Festival hi October 2 - 13, 2024 chhungin neih a ni dawn a, October 7-ah Kate Winslet hnenah award hi hlan a ni ang. Golden Icon Award hi lemchan lama che ṭha leh hlawhtlinna ropui tak neite hnena hlan a ni ṭhin a, he chawimawina hi Jessica Chastain, Hugh Jackman, Cate Blanchett leh Hugh Grant te pawhin an lo dawng tawh a ni. Zurich Film Festival-a artistic director, Christian Jungen chuan Kate Winslet chu lemchan lama icon dik tak a ni tih sawiin, lemchan khawvela hun rei tak awm tawh niin, role hrang hrang hnehsawh takin a chang a, generation hrang hrangten lemchan thiam an ngainat ber zingah a tel thei reng a ni, a ti. Festival-ah hian Winslet-i channa thar ber, 'Lee' chu tih chhuah a ni dawn bawk. He film hi fashion model aṭanga war photographer-a inlet, Lee Miller chanchin tarlanna a ni.