Instagram-in post pakhata thlalak dah theih zat ti pung

Meta hnuaia photo and video sharing social networking service, Instagram chuan post pakhata thlalak leh video dah theih zat chu 20-ah a ti pung.

Company chuan August 8, 2024 khan he thu hi puangin, carousel post, 'photo dump' tia sawi bawk, pakhata thlalak 10 chin dah theiha ansiam chu 20-ah tih pun a ni tih a sawi a ni. Carousel feature hi kum 2017 aṭang khan an dah ṭan a ni.

Instagram hian carousel function changtlung zawk siam tumin tun hnaiah pawh feature thar a lo siam tawh bawk. TikTok elin thlalak leh video dah theih zat pawh hi a la tih pun chhoh rin a ni bawk. TikTok-ah hian post pakhatah thlalak hi 35 chin a post theih a ni.

Carousel feature thar hi user tam takin ṭha an ti hle a, hetih rual hian ṭhenkhat erawh chuan post pakhatah slide 20 dah chu thil ṭha lo tak a ni, tiin sawisel tawk an awm thung. Mahse content creator, influencer leh business lam tan chuan he update hi a ṭangkai hle rin a ni. User pangngai tan erawh thlalak 20 scroll ziah hi an peih vek kher lo maithei.

Feature thar hi khawvel pumah hman theiha chhawp chhuah nghal a ni a, he feature hmang tur hian Instagram app chu a version thar berah update tur a ni.