S.Coups-in ran humhalhtu pawl hnenah KRW mtd 30 hlan

Korean boy band Seventeen member S. Coups chuan a pian champha lawmna pualin animal rescue organisation, WeAct hnenah an ram pawisa KRW mtd 30 (US dollar 21,831) a hlan.

S Coups hian September 2022 khan Hwaseong Breeding Farm-a ui an vulhte chhanchhuahna atan WeACT a thawhpui a, KRW mtd 30 a lo pe tawh bawk. Tun ṭumah hian ama hming leh Seventeen fandom, Carat hmingin ṭanpuina a pe leh a ni. A sum thawh hi WeAct-in ran tihnawmnah tawk an chhanchhuahte enkawlna atan hman a ni ang.

WeAct chuan S Coups thiltih avang hian ram hrang hranga Carat leh fan dangte pawhin ran tihnawmnah an nih ṭhin chungchang an ngaihven phah a, a ṭha zawnga nghawng lian tak neiin, a thiltih chu zau zawka puanzar zel an tum tih an sawi.

Kumin June thla khan Seventeen hi K-pop group zinga a hmasa ber turin UNESCO Youth Goodwill ambassador atan ruat an ni a, UNESCO hmalakna atan an group hian USD mtd 1 (KRW tld 1.39) an lo thawh tawh a ni.