Disney Fan Event D23 event zo fel ta

Anaheim, California-a D23 : The Ultimate Disney Fan event neih chu nimin, August 11 khan zawh fel a ni ta. He event hi August 9 aṭang khan Anaheim Convention Center leh Honda Center-ah neih a ni.

D23 tih hian D hi Disney tihna niin, 23 hi Walt Disney-a'n company a din kum, 1923 sawina a ni. He event hi a hmain D23 Expo tih a ni ṭhin. Kum hnih danah Anaheim-ah hian buatsaih ṭhin a ni a, movie preview, exhibition, panel discussion bakah Disney star lar ten presentation te an nei ṭhin a, hei bakah an film thar tur pho lanna hunte hman a ni ṭhin.

Kumina D23-a Disney-in an project hmabak an tarlan ṭhenkhatte:-

Mustafa: The Lion King - 'The Lion King' prequel hi siam a ni dawn a, Mufasa chanchin thlur bing niin, Scar-te inṭhian hma lam hun a ni dawn a ni. He movie hi December 20-a tih chhuah tum a ni.

Avatar: Fire and Ash : D23-ah hian James Cameron chuan Avatar 2 official title tur a rawn puang a, 'Avartar : Fire and Ash' tih a ni ang. A footage pho lan ni lo mah se a storyline erawh sawi chhuah a ni a, Na'vi tribe thar 'Ash people' tih kan hmu dawn a ni. Nakkum December 19-a theatre-a chhuah tum a nih thu an puang nghal bawk.

Snow White: Disney Princess chu live-action in kan hmu leh dawn. Rachel Zegler chu Snow White ah changin, Gal Gadot chu evil queen a ni ang. March 21, 2025-ah tih chhuah a ni ang.

Freakier Friday: Lindsay Lohan leh Jamie Lee Curtis-te chu 'Freaky Family' sequel 'Freakier Friday' ah an chang leh dawn a, D23 stage-ah star pahnihte hi an film chanchin sawiin an inlan dun nghe nghe. Nakkuma tih chhuah tur a ni a, a hun tak erawh a la chiang lo.

Toy Story 5: Toy Story fifth instalment hi kum 2026 nipui lai vela chhuak hman tura ruahman a ni. Woody, Buzz Jessie leh toy gang-te kan hmu leh thei dawn.

Moana 2: D23-a telte hi 'Moana 2' trailer entir an ni a, he sequel hi kumin November 27-ah tih chhuah a ni ang. Auli'i Cravalho chuan Moana aw a thawh a, Dwayne Johnson pawhin Maui aw a rawn thawh leh bawk.

Heng bakah hian project an neih mek zingah hian Zootopia 2, Lilo & Stitch, Agatha All Along, Elio, Incredibles 30, Hopper, Skeleton Crew, LEGO Star Wars leh Percy Jackson & the Olympians Season 2 te pawh an la awm a ni.