SRK hnenah Career Achievement Award hlan

Bollywood superstar, Shah Rukh Khan chu Inrinni liam ta khan Switzerland-a 77th Locarno Film Festival-ah Indian cinema tana a thawh hlawk avangin chawimawina ngaihhlut, Pardo Alla Carriera Award hlan a ni.

Locarno Film Festival hi kum 1946 aṭanga siam niin, khawvela annual film festival upa ber zinga mi a ni. Kumin festival-ah hian film 225 pho lan a ni dawn a, heng zingah hian world premier 104 bakah debut movie 15 an tel.

Shah Rukh Khan hi kum 2023 khan a che ṭha hle a, blockbuster hit "Pathaan"-ah Deepika Padukone leh John Abraham nen an chang a, hemi hnu hian film sawisel leh ngaihven hlawh tam, 'Jawan' ah a chang leh bawk. Hei bakah film hit dang 'Dunki' film hmangin nikum kha a khar bawk a, he film-ah hian Taapsee Pannu, Vicky Kaushal leh Boman Irani te nen an chang ho a ni.

Locarno Film Festival director, Giona A. Nazzaro chuan Shah Rukh Khan chu artist ropui tak a ni a, a hnathawh hmangin mi tam taka suangtuahna leh beisiena te a puang chhuak a, an duhthusamte a tihpuitlin sak a ni tiin, hei vang hian he chawimawina ngaihhlut tak dawng tura thlang an nih thu a sawi.