Khiangte Construction Ṭhazual Lengzem-ah Projek_Liantluang a langsar

Khiangte Construction Ṭhazual Lengzem chart tharah Projek_Liantluang a langsar chhunzawm zel a, Top 10-ah hla pathum an lang thei.

Projek_Liantluang x David Darlong 'I tling tawk' chu Ṭhazual Lengzem chart tharah pakhatnaah a rawn inhlangkai. He hla hi Dr. Albert Vanliantluanga (Ezra pa) phuah a ni a, music & recording hi Tluanga Hnamte kut chhuak niin, music video hi Aeries visual leh Hlutea siam a ni. Dr Albert hian hla eng emaw zat phuah tawhin, hla mawi leh ṭha tak tak min rawn chhawpchhuah sak tawh a, chart hmasaah pawh a hla phuah bawk hi pakhatnaah a lo awm tawh a ni. 'I tling tawk' hi a nupui, Ezra nu tana a phuah a ni. June 19, 2024 ah David Darlong YouTube channel-ah dah a ni a, a hla a mawiin a satuin a thiam bawk nen, 'feel' veng veng chi a ni.

Mendal x Smiley pawhin hma rawn sawn zelin, an kutchhuak 'Kum za' chu pahnihnaah an rawn chhohpui. Smiley hian music leh recording hi khawihin, video hi Osiama Pictures siam a ni thung. A hla pakhat hmanga rimawi khawvela boruak lian tak nei thei, Guru Gee pawhin 'Darbiahnem' hmangin thawm a rawn nei lian chho leh a, pathumnaah a rawn lang. Hei bakah hian Projek_Liantluang hnuaia a hla thar dang, 'Ka tlei ve nan' chu Top 5-ah a lanpui bawk a ni. MDM Lunglei various artists chuan 'Zanthim hnuaia chhimbal' chu palinaah a rawn chho bawk.

Ṭhazual Lengzem top 10-ah hian Angela Malsawmpari, Project_Liantluang x Lalhmangaihzuali, R. Lalruatkima, Rinfeli Khiangte leh Marina Vanhriatpuiii te an lang bawk a ni.