People's Choice top 10-ah tel nghal dawn RFL Plastics Miss Mizoram 2020

Mizoram Journalist Asso­ciation leh Zonet cable TV buatsaih Miss Mizoram 2020 contest chu neih mek zel a ni a, sub-title pakhat, People's Choice dawngtu chu Top 10 finalist-a tling nghal tur a nih avangin contestant leh anmahni buaipuitute pawh an ṭang hle.

People's Choice hi contes­tant-te social media fan in­terac­­tion aṭanga ṭhlan tur a ni a, February 6-a Miss Mizoram 2020 khuhhawnnaa neih ni 

aṭang­a chhiar ṭanin, contestant-te Instagram follower ngah dante, Miss Mizoram Instagram page-a contestant-te'n like-tu an ngah dante leh YouTube-a contes­tant-te video like-tu tam dante chu tehna a hman a ni ang.

People's Choice dawngtu hi intihsiakna hrang hrangah midang aia che ṭha lo zawk leh point hmu hniam zawk a lo nih palh pawhin, automatic a Top 10 finalist a inhlangkai tur a nih avangin he sub-title dawngtu nih hi contestant-te tan a hlu dawn hle a ni.

Miss Mizoram contestant-te hian naktuk Valentine's Day hian Gan Sabra, Tanhril leh Old Age Home, Govt. Complex an tlawh dawn bawk.

Gan Sabra-ah hian nau­pangte zingah hun an hmang ang a, Old Age Home-a awm te pawh hun an hmanpui dawn a ni. Heng hmun an tlawha an hun hman dante chu zanlamah TV-a tihchhuah nghal a ni ang.

Miss Mizoram 2020 con­testant-te hi Valentine's Day puala thisen pek runpui neihna hmunah an kal dawn bawk a ni.

Miss Mizoram contestant-te hian ethnic wear shooting an nei zo tawh a, hei hi TV episode-a tihchhuah tur a ni. Ethnic wear shooting hi photographer lar Jeremy Hauhnar chuan a neihpui a, Miss Mizoram 2017 Rody H Vanlalhriatpuii chuan rampwalk a zirpui bawk. Hei bakah hian grooming session dang pawh mithiam bikte'n an neih pui reng bawk a ni.

Miss Mizoram 2020 hi March 14 zanah grand finale neih a ni dawn a, chumi hma chuan contestant-te chet­velna chi hrang hrang chu TV episode hrang hrangah tihchhuah zel a ni ang.