MSL Dance Battle

Dance Crew ten round 1 an lâm zo ta

MSL halftime show-a dance battle chu a Round 1-na zawh fel a ni ta. A hmain crew 6 te an in-battle tawh hnuah kar liam ta khan crew dang 6 te an in-battle ve thung a. Tah hian Nerds of War, Myn’X leh Mystic Movers te an chak.
Ningani zana Khatla TBL leh Mission Veng Vikings inkhelah, home crew Nerds of War ten Vikings crew Dance & Beatz te an hneh. Nerds of War-ah hian mipa pahnih leh hmeichhe pahnih an awm a, MSL-a pair inkawpkim awm chhun an ni. Anni hi an dangdaiin, partnering-a inchawi harsa tak tak te an rawn telh a, Dance & Beatz lam hi hmeichhe hlang niin, chhiat tawk an awm avangin an member 4-ah pahnih chauh an rawn lam thei. An first battle-ah hian hneh lo hle mah se an lâm leh huna an dance crew tum tur te laka an chak ngei theih nan theihtawp chhuahin an inbuatsaih nghal.
Zirtawpni tlaia Zarkawt derby inkhelah Serpents home crew Myn’X leh BCA away crew Anonymous Sings te an intum. Myn’X hi energy sang tak nen, an lâm a rawn puak chhuak ṭha hle a, chak zawkah an ṭang ta a ni. Myn’X hi an dinna a lo rei tawh a, he dance battle tan bik hian mipa 5 an rawn tel. Anonymous Signs te hi lâmah chuan la junior deuh zawk an ni a, mahse member ngah zawk an ni. An first battle-ah mipa panga leh hmeichhe pakhat an rawn lâm a, an idea te ṭhain dangdai hle mah se, lâm lamah an ṭan a ngai lehzual dawn.
Chaltlang Ryders leh Tuikual South B.C te zana an inkhelah, Ryders home crew Sharp Kats leh TKS away crew Mystic Movers te an intum a, Mystic Movers te an chak zawk. He crew-ah hian mipa pathum leh hmeichhe pakhat awmin, an style hi a rawn dangdai deuh hlek a, street jazz leh hip hop te rawn telhin, mipui lawm pawh an hlawh hle. Sharp Kats lam hi hmeichhe hlang an ni thung a, an ni pawh hian street jazz leh hip hop tho an rawn mix a, hmuhnawm viau mah se an execution leh team work lamah te an ṭan a ngai dawn hle.
Basketball Club te pawh Home-a an khelh ṭuma an neih tur Cheer leaders te pawn hma an rawn hruai ṭha viau. TBL cheer leaders ten show rawn nei kher lo mah se an rawn phurin mipui an chawk hlim. Serpents leh Ryders cheer leaders ten an match ṭan hma leh halftime-ah show an rawn nei ve ve a, an hmuhnawmin an duai lo hle. Cheer leaders lam pawh hi an rawn ṭang hle a, club te tan ṭhahnem an rawn ngai a, Club dang te aia chung­nung zawk nih an tum hle.
Dance battle bikah chuan MSL Crew 12 te an rawn lam kim tawh a, rawn ding chhuak deuh te pawh awmin, rawn improve chho theite pawh an awm. An rawn lan leh hun ṭheuh hi a pawimawh hle. Stage-a lo perform ṭhin dancers te hian Basketball court zau taka han lâm chu a dan a dang tih an hre vek tawh a, hei vang hian an movements te rawn bei lian leh zualin, choreography ṭha lehzual rawn phochhuah an tum. Best Dance Crew ni turin points an khawl lawk tih hre rengin, an lâm hmasa zawk ṭheuh khûm tumin an rawn bei leh ṭheuh tur hi en a chakawm tawh hle.