Box Office: Ryan Reynolds leh Blake Lively-ten No 1 leh 2 hauh

North American box office-ah Ryan Reynolds leh a nupui, Black Lively ten ro an rel a, an channa film chu No 1 leh 2 ah an awm.

Ryan Reynold leh Hugh Jackman channa, "Deadpool & Wolverine" chuan a kar thumnaah USD mtd 54.2 lak luh belhin No 1 dinhmun a la hauh chhunzawm zel. Hetih lai hian Blake Lively channa, "It Ends With Us" chu an tlangzarh karah USD mtd 50 la lutin No 2-ah a rawn awm ve bawk.

Box office-a nupa channa No 1 leh 2 an nih theih hnuhnung ber chu kum 1990 daih tawh kha niin, Bruce Willis channa "Die Hard 2" chu No 1 niin hetih laia a nupui, Demi Moore channa "Ghost" chu No 2 a ni ve bawk.

"Deadpool & Wolverine" hian North America-ah USD mtd 494.3 chuang la lut tawhin, khawvel huapa a sum hmuh hi USD tld 1.02 a tling tawh bawk. 2019 film, "Joker' hnua R-rated film zingah sum la lut tam ber a ni tawh a ni.

"It Ends With Us" hi Collen Hoover novel behchhana siam niin, Lively bakah Justin Baldoni leh Brandon Sklenar te an chang a, romantic drama ngainatute zingah a tla na hle. A entu tam ber pawh hmeichhia an ni a, TikTok lamah pawh a lar hle.

Video games lar tak behchhana siam, star langsar Cate Blanchett leh Kevin Hart-te channa, "Borderlands" chuan beisei a pha lo hle a, budget USD mtd 120 senna film hian tlangzarh karah USD mtd 8.8 a la lut thei. Hetih lai hian "Twisters" leh "Despicable Me 4" te chu an la che ṭha chhunzawm zel a, USD mtd 15 leh USD mtd 8 an la hmuh belh thei a ni.