Temi Sailo a Kraws a la sang zel

Mizoramah harh­na hmun hrang hranga thleng thawm kan hriat mek laiin, Temi Sailo hla, Kraws Thu pawh chawisanin a la awm zel a, Dafodils Ṭhazual Faknaah a vawi hnih nan pa­khatna a hauh leh.

October thla tawpa a dah, Kraws Thu hi Temi Sailo-in ama puala a music video hmasa ber a ni a, Dafodils Ṭhazual chart-a pakhatna a hauhpui nghal thei mai ni loin, ṭum hnih lai pakhatna a hauh thei hian a zaithiam tih a tichiang hle. BCM Aizawl Choir-a member ni lai Temi hian Gospel music huang chhungah chuan hmalam êng tak a nei.

Hmingtea leh Sailo Nutei te hla, Kir Leh Rawh chu pahnihnaah bawk a awm leh. He hla pawh hi a ṭha a, a satute pahnih hi an thiam a, Hmingtea phei chu kan hre lehzual hle. Pakhatna hauh thei tur khawpin a ṭha niin alang.

Maggie-in hma a rawn sawn chho zel a, pangana aṭangin pathumnaah a rawn chho ta. Ani hi pakhatna la hauh thei tur khawp a ni tho mai. Bethsy-i hla thar 'Min Hmangaih si a' tih chu top 10-a a ṭum hnih lannaah palinaah a rawn kai chho ta dawrh bawk. He hla hi a hma chiah Dafodils Ṭhazualah khan a rawn lang thar a, pasarihnaah bul a rawn ṭan a, tunah chuan palina a ni ta. Angela Lalremtluangi pawh pariatna aṭangin panganaah a rawn kai chho bawk.

Dafodils Ṭhazual 10 aṭang hian Vanlalsailova a liam a, Tabithians an rawn lang thar. Hranghlui tia sawi ve theih ṭan tawh mai tur Betea pawhin hmalam a pan zel e.