TCHTA hla thar Thil thleng tak tak hmanga a hla phuah chu

Dafodils Ṭhazual chart-a pakhatna hauh thei, Mizo Idol alumni, Thiamchantira chuan music video thar a peih fel leh ta a, a hla thar hi ama phuah niin, nula pakhat nuna thil thleng tak tak behchhana a phuah a ni.

Thhiamchantira hla thar hi 'Lo Kir Rawh' tih hla a ni a, nula pakhat chanchina thil thleng tak tak behchhana a phuah a ni. He hla hi a bialpa chu a hnena kir leh tura auhna hla a ni a, Thiamchantira hian hla a phuah thiam hrim hrim bakah, thil thleng, nula pakhat nuna thil thleng tak tak chanchin a nihna hian ngaihthlak a tichakawm hle. Tunah hian MDM Library-ah dah luh a ni tawh a, rei loteah kan hmu thuai tawh ang.

A zaithiam mai bakah TCHTA hian hla phuah a thiam hle a, hla 30 aṭanga 40 vel lai a phuah tawh a ni. A hla phuahte hi ama'n a sak mai bakah zaithiam lar dangten an saksak nual tawh a, Biakfela Pachuau leh Rosy K. Remsangpuii ten an sak tawh bakah, Sangkimi Khiangte chuan tunah hian music video a siam mek bawk.

'Lo Kir Rawh' tih hla hi a video lam Zoa'n a khawih a, music hi RKA niin, Three Brothers-ah record a ni. He music video hi TCHTA music video pangana a ni a, ama phuah bik liau liauah chuan palina a ni. Tunah hian hmabak a nei leh mek a, unplug lam hawi a buatsaih chho ṭan a, hei bakah hian punk rock lam chi siam leh a tum bawk.