Focus hmangin Will Smith

Beisei lawk angin Will Smith-a channa thar ber Focus chu box office aṭanga sum lalut hnem ber a ni. Kar tawp chhung khan he romantic movie hian USD mtd19.1 a lalut.

Will Smith-a channa hmasa, After Earth ai khan box office-a opening week-ah sum a lalut tlem zawk hle nachungin a senso aṭanga chhutin a hlawhtling zawk hle. After Earth kha kum 2013-a tihchhuah a ni a, kha film siam nan khan USD mtd130 zet sen a ni a, mahse opening week-ah USD mtd27.5 a lalut chauh a ni. Tuna mi, Focus hi USD mtd50 senga siam a ni a, a budget a hniam zawk fe a, a percent-a chhutin a sum hmuhchhuah hi a ṭha zawk fe.

Kar hmasaa pakhatna, Fifty Shades of Grey kha palinaah a tla thla ta daih a, kar tawp chhung khan USD mtd10.9 a hmu chhuak a, kar hmasa nena a chhutin a sum hmuh tlakhniamna hi za zelah 74 zet a ni. Khawvel pum chhut erawh chuan he film hi a la hlawhtling hle rih zel. Ram 59 aṭangin kar tawp chhung khan USD mtd36 lai a lalut thei. US tiam loa ram dang aṭanga a sum hmuh chhuah tawh USD mtd338.4 a ni a, US nen chuan USD mtd486.2 a tling tawh.

Box office-ah hian pahnihnaah Kingsman: The Secret Service a awm a, he film hian kar tawp chhung khan USD mtd11.8 lai a lalut a, pathumnaah The SpongeBob Movie: Sponge Out of Water a awm bawk.

Box office movie

"Focus" - $19.1 million

"Kingsman: The Secret Service" - $mtd11.8

"The SpongeBob Movie: Sponge Out of Water" - $mtd11.2

"Fifty Shades of Grey" - $mtd10.9

"The Lazarus Effect" - $mtd10.6

"McFarland, USA" - $mtd7.8

"American Sniper" - $mtd7.7

"The DUFF" - $mtd7.2

"Still Alice" - $mtd2.7

"Hot Tub Time Machine 2" - $mtd2.4