Billboard 200: "Vultures 2" in "TTPD" nek chhuak zo lo

Billboard 200 album chart tharah Kanye West leh Ty Dolla $ign thawhdunna, "Vultures 2" chuan tlangzarh a nih hma aṭangin thawm nei lian viau mah se Taylor Swift "The Tortured Poets Department" a nek chhuak zo lo.

"The Tortured Poets Department" hi No 1-ah awm chhunzawm lehin, a zawn loin kar 14 chhung chu chart chung ber dinhmun hi a luah tawh a ni. Kar liam ta khan US-ah equivalent album unit 142,000 nei belh lehin, a hla 31 te hian on-demand official stream mtd 75.43 an nei bawk.

Kanye West leh Ty Dolla $ign te album thar, "Vultures 2" chuan equivalent album unit 107,000 neiin No 2-ah a awm. He album-ah hian hla 21 a awm a, artist dang eng emaw zat an thawhpuina pawh telin, heng zingah hian Don Toliver, Kodak Black, Playboi Carti, Future, Lil Wayne, Desiigner leh Young Thug te pawh an tel.

Chappell Roan solo album, "The Rise and Fall of a Midwest Princess" chu No 3-ah chhoin, equivalent album unit 64,000 a nei. August 1-a Lollapalooza-a a perform hnuah chart lamah pawh hma a rawn sawn chho a ni. Morgan Wallen "One Thing at a Time" chu No 4-ah a tla thla ve thung a, hetih lai hian Billie Eilish chuan "Hit Me Hard and Soft" chu No 5-ah a la awm ngheh pui zel.