Fak Zai top 10 intihsiak ṭan dawn

Mal zai intihsiakna, Pentecost Fak Zai neih mekah zanin dar 8:00 hian top 10 intihsiakna ṭan a ni dawn. Zaninah hian zaithiam pangain intihsiakna an hmachhawn ang a, August 16, Zirtawpni zan dar 8:00-ah zaithiam panga dangin intihsiakna hi an hmachhawn leh ang.

Mizoram UPC Conference Hall, Zonuamah live music nen zaithiamte hi an inel dawn a, 'show' pawh hmuhnawm leh nung sawt tura beisei a ni.

Zaninah hian Fak Zai chief judge Rev. Dr. Ngurthanpara Sailoin, "I leikapui zai ka tiphal lo, i ram riak zai ka ti mai," tia a fak Shion Lalbiaknunga, N. Mualcheng nula, aw ngaihnobei tak nei Zonunsangi, lengkhawm zai 'specialist' Lalruathlui, aw pa tak Lalzemawia leh Dinthar nula zaithiam leh hmelṭha C. Lalruatsangi te an inlan ang.

August 16, Zirtawpni zana inlan turte - N. Mualcheng chhuak Sylvia K. Ramdinsangi hi a aw a chak ṭha a, N. Chaltlang lam mi C. Chawngsangzela aw hi 'aw pa' ngaina tan ngaihthlak a khamawm loh. Zonuam nula Lalhmangaihzuali hi a chesual a nih loh chuan a zai ngaihnawm leh dawn. Ainawn tlangval Vanlalhmachhuana inrintawkna hi show tihmuhnawmtu a tling a, Buhchangphai tleirawl Malsawmzuali hi Fak Zai judge Upa F. Vanlalchama chuan, "The New Lalthansangi," tiin a fak bawk.

Fak Zai judge zinga mi C. Lalmuanpuii chuan, "Live music nena inelna hian kan zaithiamte theihna tak tak a pholang dawn a, hei hian kan inelna a tihluin, a tihmuhnawm sawt turah ka ngai," tiin Vanglaini a hrilh. Pentecost Fak Zai hi Zonet Rimawi lamah live-a en theih a ni dawn a, online-a en duh tan General PYD YouTube channel lamah a en theih bawk ang.