Eminem-a'n album thar a 'drop' leh thut! ‘Music to be Murdered By – Side B’

Rapper ropui Eminem chuan a tih fo ṭhin angin album thar a 'drop' leh thut a, a album hming chu Music to Be Murdered By: Side B (Deluxe Edition) tih niin nimin khan a tlangzarh a ni.

Pathianni liam ta mai khan Twitter user leh hip-hop leaker @OnnThinIce chuan Eminem-a'n kumtira a tlangzarh Music to Be Murdered deluxe edition art work tarlangin Music to Be Murdered By: Side B (Deluxe Edition) a nih thu a tarlang. He art work hi a hmain official-a tihchhuah a la ni lo a, hemi hnu lawkah hian Genius.com-ah a track list niawm tak pawh tarlan zui a ni leh a, mahse a hnuah an paih leh vat. Eminem fan-te'n thil thar an beiseina a lian tawh hle a, an rap idol chuan album thar a tichhuak ngei dawn niin an ngai a, mahse engtikah nge a tihchhuah dawn tih Eminem berin a sawi chhuak duh si lo a, a hmaa an hriat thawi deuh thuak thuak chu thutak khuka khukpui chi a ni em tih an ngaihtuah mek laiin; music producer lar Dem Jointz chuan cover art chu official a ni tih rawn tichiangin niminah Eminem chuan a album thar a tlangzarh ta a ni.

Eminem hian a album thara hian mi hrang hrang a thawhpui leh a, chung zingah chuan a hmaa a lo thawhpui fo tawh ṭhin Skylar Grey leh Dr Dre te pawh an tel.  DJ Premier,  Ty Dolla Sign leh White Gold-te pawh a thawhpui bawk.

‘Music to Be Murdered By – Side B’-ah hian track 16 a awm a, Music to Be Murdered By-ah khan track 20 lai a awm thung. Kumin chhungin Eminem hian album pahnih a tlangzarh ta a, January 17 khan puangzar lawk miah loin Music to Be Murdered kha a tlangzarh a ni. Hetah pawh hian mi hrang hrang thawhpuiin  Juice WRLD, Ed Sheeran leh Young M.A-te pawh a thawhpui zingah an tel.

Kum 1996 khan Marshall Bruce Mathers III hian a album hmasa ber Infinite chu a lo tlangzarh tawh a, hetih hunlai hi chuan khawvelin a la hre hran lo. Kum 1999-a The Slim Shady LP a tlangzarh aṭang erawh chuan khawvelin Eminem chu tunge a nih a zawh nawn a ngai leh tawh ngai lo. The Slim Shady LP achin a album tlangzarh zawng zawng erawh a hlawhtlinpui em em vek a ni.