2024 People's Choice Country Awards nomination puang

2024 People's Choice Country Awards nomination kimchang chu puan a ni ta a, Beyonce Knowles leh Zach Bryan te an langsar hle.

Kumina award sem turah hian category paruk belhin, song category vek an ni. September 26 hian Nashville-a Grand Ole Opry House-ah sem a ni dawn a, Canadian singer Shania Twain-i'n a host dawn a ni.

Zach Bryan chuan nomination hmu hnem berin 17 zet a hmu a, tun hnaia Countre genre lama inlet thar, Beyonce Knowles pawh a che ṭha nghal a, nomination 17 a hmu. Anni bakah nomination hmu tam dangte chu - Kacey Musgraves (15), Shaboozey (12), Kane Brown leh Morgan Wallen (11 ve ve) leh Luke Combs (10) te an ni. Nomination hmu tam paruk zingah pathum hi mi hang an ni a, hei hi county music awards-a thil thleng khat tak a ni. Nomination hmu tam pariat zingah pathum chu hmeichhia an ni bawk a ni.

People's Choice Country Awards-a hian fan-te an pawimawh hle a, an motto-ah pawh "an award show for the people and by the people." tih an hmang. Category tin hi fan-te vote hmanga thlan niin, August 23 thleng vote thlak hun an hawng. August 20 hi 'Turbo Tuesday' an ti a, hemi ni bika vote tlate chu a vawi hnih zel chhiar nawn an ni ang.

Kumina award sem tura top category, People's Artist of 2024-ah hian Beyoncé, Jelly Roll, Kacey Musgraves, Kane Brown, Lainey Wilson, Luke Combs leh Morgan Wallen te an inel dawn a, 2023-ah khan Wallen hian he award hi a dawng a ni.