Mizoram Music Teachers' Meet

Mizoram hmun hrang hranga rimawi leh a kaihhnawih zirtirtute chuan nimin, August 15 khan Sports and Youth Services Conference Hall, MINECO-ah meet an nei.

Meet-ah hian music zirna mumal zawk kalpui a nih theihna turin - Govt Registration, State and International Music Exam Board, Teaching Skill leh Teacher's Online Registration chungchangte sawi ho a ni.

Kum dangah hetiang hi buatsaih a lo ni tawh ṭhin a, RSLAwards syllabus hmangte chauh an tel ṭhin. Kuminah erawh chuan huam zau deuh zawkin Trinity, ABRSM leh RSLAwards syllabus zawm tur bakah Church Music lam zirtirtute nen Aizawl, Lunglei, Serchhip, Champhai, Kolasib leh Mamit-a music zirna 49 aṭangin zirtirtu mi 60 chuang an kalkhawm.

Zothanmawia LAR RSLAwards India chuan hun a hmang a, rimawi zirna lamah hmasawnna leh rahbi thar a hring chhuah ngei pawh an beisei tih a sawi. "Mumal zawka zirna hian Sakhaw lama kan rinna leh kohhran kalphung te, hnam zia rang pholan nana hnam zai leh lam vawnhim, chawi nun, humhalh kawngah nasa zawkin min pui ngei ang," a ti.