Pensy hla thar 'I lam min thlir tir ṭhin'

Mizo gospel singer zinga hriat hlawh ber zinga mi leh a zai Pathianin a hman em em ṭhin Pensy B Lalthangliani chuan hla thar 'I lam min thlir tir ṭhin' chu a tichhuak ta a, a official YouTube channel lamah en theihin a chhawp chhuak tawh.

Pensy hi Zaipawl lamah a inhman avangin hun eng emaw chen hla thar a tichhuak lo a, nikum  lamah pawh khan hla thar a tichhuak tam lo hle. Hetichung hian a hla tihchhuah tawh ho hian YouTube lamah pawh thlir a hlawh a, viewer nuai chuang a nei fur hlawm.

'I lam min thlir tir ṭhin' hi C Chawng­hmingthanga phuah a ni a, vanduaina mihring chunga thleng ṭhin pawh hi Pathian lam min hnaih tir ṭhintu a nih zawk thu puanchhuahna hla ṭha tak a ni. 

Recording leh music hi Blue Wave Records kut chhuak a ni a, music video hmuh­nawm tak hi Thangtea CVL siam sak a ni bawk. Thlira nghaihthlak a manhla hle.

Pensy hian zai lamah nasa lehzuala inhman thar leh a tum a, hunawl pawh a nei hman meuh lo. Hmachhawp tam tak a nei a, hla thar ṭha tak tak kumin chhungin kan hmuh chhoh beisei ang.