Oscars Eddie Redmayne Best Actor kha a vanneih vang a ni em?

Nikum chhungin movie ṭha leh ropui tak tak a chhuak a, chungah chuan actor lar leh khawvelin an star rawn an chang a ni. Chutihlai chuan khawvelin a hriat tho si, hriat em em ni chiah lo, Eddie Redmayne chuan Best Actor a dawng tlat! Eng vang nge, eng nge a chhan? Midang aiin a chang thiam bik em em em niang?

A chang thiam thawkhat tih chu a hriat mai a, a film chan tam takah pawh a thiam hle. A elpui dang, Best Actor huang chhungah hian Michael Keaton, Steve Carell, Bradley Cooper leh Benedict Cumberbatch te an awm a, Redmayne hnenah hlan a ni ta zawk. A elpuite hi an thiam em em tho, mahse Oscar-ah hian film hlawhtling theih dan deuh a awm a ni!

Best Actor category-a award latu film reng reng hi, kum eng emaw kalta aṭanga i thlir chuan chanchin tak tak, real life story a ni deuh zel mai! Nikum khan Matthew McConaughey chuan film lar lutuk lo, box office-a lar ber ni pha lo, Dallas Buyers Club hmangin a la tawh a, hemi hmalam hian The King's Speech-a a changtu Colin Furth chuan a lo dawng tawh bawk a, Abraham Lincoln lema chang Daniel Day-Lewis-an a dawng tawh bawk.

Tun ṭuma Best Actor category-ah hian Bradley Cooper channa, American Sniper hi real life story tho a ni a, Redmayne channa, The Theory of Everything hi theoretical physicist, Stephen Hawking-a chanchin a ni. A lem an chanah hian Redmayne hian a tak tak a chang chhuak thiam zawk a ni. A tlangpuiin, fantasy, action, thriller tih vel aiin Best Actor-ah hian hetiang mimal chanchin emaw hian fak a hlawh a, en a hlawh zawk zel zawng a nih hi.

Eddie Redmayne chuan The Theory of Everything a chan chhungin Stephen Hawking-a chhungkuaten nasa takin an ṭanpui tih a sawi a, an chhungkua an inhawng a, chu chuan Hawking-a lem a channa lamah pawh nasa takin a pui niin a sawi bawk.