Suria buaina leh climate

ISIS te chet tlatna leh hlauhawm zualna hmun Suria ram hi tunhnai, kum eng emaw ti aṭang khan a buai em em a, indona tualzawlah a chang a ni ber. Hetianga firfiaka chetna leh indona lo chhuah chhanah hian mithiamte chuan suk leh sa inthlak leh global warming chu a lian pawl a ni, an ti.

Tunhnaia Suria ram dinhmun uluk taka an zirchiannaah, kum 2006 aṭanga 2010 chhunga khawkheng he rama thleng kha tuna firfiaka chetna leh indona awmna chhan pakhat a ni tih zirchiangtute chuan an sawi.

University of California, Santa Barbara-a climatologist, Colin Kelley chuan kum 2006 aṭanga 2010 chhung khawkheng lo thlen chhan kha kum engti zat kalta aṭanga mihringte thil tih avanga rawn thleng a ni tih a sawi. "Khawkheng thlen chhan kha tam tak mawhpuh tur a awm chungin, a lian ber chu mihringten thil tih vang a ni," a ti.

Ramngaw ṭhiah vang te, mihringten energy kan hman nasat tial tial avanga carbon chhuak hnem tial tial avangtein Suria leh a chhehvelah hian harsatna a thleng a ni. Kum 1900 ai khan tuna Suria ram khawlum lam chawhrual chu fahrenheit hnih ngawtin a sang tawh zawk a, ruahtui an dawn pawh kum 1900 aiin 10% zetin a tlem tawh zawk.

Ruahtui a tlem tial tial tak avang leh khawkheng avangin mi tam tak, loneih leh ranvulha innghatte tan eizawn hleih theih a ni ta lo a, eizawnna awlsam beiseiin khawpuiah an pem lut niin, an zirchianna, National Academy of Sciences-a an present-ah chuan tarlan a ni. Suria ram khawpui hrang hrangahte thingtlang aṭanga pem lut hi mi maktaduai 1.5 zet an tling a, khawpuiah hian sorkarin a lo ngaihthah a, eizawnna a harsa tho bawk si a, chu chuan firfiaka chetna leh tharum thawhna hi a hring ta niin zirchiannaah hian tarlan a ni.