Wrestler Shawn Michael 'Isua Krista hi bengin chauh chuan ka hre thin a, tunah chuan ka hmu ta'

A hunlaia wrestler lar leh Mizo naupangtena an tan em em, Shawn Michael kha, tunah chuan wrestling a chawlhsan tawh a, thlarau lamah erawh chuan inchaina lian zawk a hmachhawn reng a, chutah chuan a rin Isua avangin hnehtu a ni chho reng thung.

Michael Shawn Hickenbottom, Shawn Michael tia ring chhunga kan hriat lar hian a nunah harsatna tam tak a tawk ve ṭhin a, zu a in nasa a, nachhawkna lam chi a addict bawk. Hetiang harsatna hrang hrang avang hian kum 1998 khan loh theih lohin wrestling a chawlhsan a ngaih phah ta a ni.
"Cathlolic chhungkua aṭanga seilian ka ni a, Isua hi chu ka hre khawp mai a, mahse benga hriatna mai chauh a ni," a ti. Hetianga Shawn Michael-an ruihhloa harsatna a tawh takah hian a nun chhanhimna tur a zawng a, a nupuiin nasa takin a pui a, Isua a hmu a, a nun chhanhimin a awm a, Isua Krista avangin a harsatna zawng zawng chu a hneh ta a ni.
Michael chuan, "Isua hi chu ka hre teh meuh mai a, mahse ka nun hian Isua hi a experience ngai lo a ni. Hmana khawvela rawn kal a, Judatena an khenbeh tak Isua kha Pathian Fapa a ni tih hriat a, Eng­kimtithei Pathian nena min inrem­tirtu a ni tih ka hriat a, ka nunin a tawn chiah chuan a dang­lam em em a, engkim mai hi a inthlak a ni," a ti.
A ṭhat a, Krista nena an intawh hnuah, kum 2002 khan wrestling khawvelah a zuang lut leh. "Ka pianthar hnua wrestling ka luhchilh leh chu thil hi a danglam em em tawh a, a hlimawm lehzual hle a ni. Keimah ka inthunun thei a, kawng engkimah hma ka sawn a ni," a ti.
Michael hian a nun inthlak­thleng, Krista avanga danglam ta chungchang hi a buin a ziak a, lehkhabu hming hi 'Wrestling For My Life: The Legend, the Reality and the Faith of a WWE Superstar a ni. Kum 1996 khan Wrestlemania XII-ah a vawi khat nan world heavyweight title a la a, hemi hnu hian kawng hrang hrangah hlawhtlinna a chang chho.