Miss Chapchar Kût turin Mizo incheia inchei

Kum danga lo tih tawh ṭhin angin kuminah pawh Miss Chapchar Kut thlan leh a ni dawn a, Miss-a thlan turte hi Kût lawmna pui ber, AR Lammuala kal, Mizo incheia incheite aṭangin thlan chhuah an ni ang.

Miss Chapchar Kut thlang tur hian tehfung chi hrang hrang hman a ni dawn a, a pawimawh hmasa chu Kût lawmna pui bera kal a, Mizo incheina dik taka inchei ngei nih a ngai a, hei bakah hian hmelṭha leh pian nalh te tehfung hmasa tur a ni ang. Miss Chapchar Kuta thlan chhuah tawhte a thlangtuten an thlang fuh viau zel a, mi paliin pasal an nei tawh a, heng mite hian biak in hawng vekin pasal an nei.

Kumin hian Miss Chapchar Kut hian Rs. 10,000 bakah Samsung 3:16 Plan Solution aṭangin washing machine a dawng ang a, hei bakah kumin chhungin thla tin Rs. 1000 a dawng ziah bawk ang. First Runner aṭanga Third Runner Up te hian Rs. 2,000 ṭheuh an dawng ang a, runner up-te hi Samsung smartphone pek vek an ni bawk ang. Hengte bakah hian photo album Rs. 5,000 hu leh photo frame Rs. 1,500 hu, citation leh lehkhabu dangte an dawng bawk dawn a ni. Miss Chapchar Kût thlan hun chhung hi chawhma dar 10 aṭanga chawhnu dar 1 chhungin a ni ang.