Rock band ropui Metallica-in Billboard's mainstream rock song record an siam

Heavy metal legend Metallica chu kum 40 chhung, kum 10 dan apianga Billboard's Mainstream Rock Songs airplay chart-a No.1 hla nei thei band hmasa ber an ni.

Record thar siam hi Meta­llica tan hian thil thar a ni hauh lo tih chu tlang hriat a ni, mahse an band dinna pawh kum 1981 daih kha a ni tawh a, khawvel dana ngaihtuah chuan uaithla lam ve tawh tura ngaih an nih laiin kum 2020-ah pawh record thar an la rawn siam thei hian Metallica ropuina a phawrh chiang hle.

James Hetfield-te band hian '90s, '00s, '10's leh '20s-ahte Main­stream Rock Songs No. 1 hla an nei thei vek a, hetiang dinhmun thleng thei hi an la awm lo.

Mizoram zimteah pawh lar zo lo an awm fo ṭhin laiin khawvel pum huapa metal band ṭha bera mi tam takin an ngaih Metallica erawh an daihrei a, hetiang record an siam thei pawh hi an phu hle.

Record thar an siam theihna tur hian Kum 1996 khan 'Until It Sleeps' hmangin bul an ṭan a, he hla hi kar riat ngawt Billboard's Mainstream Rock Songs airplay chart-ah hian No.1 a ni a, kuminah, '20s inṭanna kumah chiah chiah San Francisco Symphony Or­chestra nena show an neihnaa an sak 'All Within My Hands' chu No.1 an nihpui leh a, hei hian mi tam tak tih theih loh tur record hi a siampui ta a ni.

Metallica hian hetiang dinhmun thlenpui theih hla hi 10 lai an nei ta a, hetiang dinhmunah hian artist paruk chiah an la ding thei a, Metallica hi pasarihna an ni ta chiah niin Billboard chuan an tarlang.

Metallica drummer Lars Ulrich chuan tun favang chhung hian hla thar an record mai thei tih a sawi.

NME-in an kawmnaah Ulrich chuan hemi chungchang hi sawi chhuakin thil awlai tak erawh a ni dawn lo tih a sawi a, inkhunghran a ngaih avangin Zoom kaltlangin an band chu an inbe reng tih a sawi a,"Ka sawi chiang thei chiah lo- thil awlai tak a ni lo a, kan theih ang tawk erawh kan chhuah a ni. Idea pawh kan in hrilh tawn nasa khawp mai," tiin an hla thar tihchhuah tum erawh thil chiang tak a la nih loh thu a sawi a ni.

1    Until It Sleeps     June, 1996

2    Hero Of The Day     December, 1996

3    Turn The Page     November, 1998

4    No Leaf Clover     January, 2000

5    I Disappear     June, 2000

6    The Day That Never Comes     September, 2008

7    Cyanide     April, 2009

8    Hardwired     October, 2016

9    Atlas, Rise!     February, 2017

10    All Within My Hands     September, 2020