Clooney-an Sudan buaina a vei

Khawvelin Mid East a thlir ṭhup a, ISIS ten khawvel politician-te mit a lak a, an thlir em em laiin Sudan leh Sudan aṭanga inlahrang ta, Darfur biala buaina chuan ziaawm lam a pan thei lo a, hei hi George Clooney chuan a vei hle. Helai biala intihhaihna leh inthahna a tawp theih nan khawvel sorkarte hma chak zawka la turin a ngen.

New York Times-ah George Clooney hian ziakin, Sudan leh Darfur biala buaina hi a tarlang. "Kar kalta lawk khan Sudan sorkar chuan heng lai hmun hi a ralmuang ṭan a, dan leh thupek kenkawh pawh a theih ta nia sawiin, muanna awm theih nana ramdang sipai dahte chu inla chhuak turin a hmin thei ta a ni," tiin a ziak. "Hemi hnu hian muanna a awm belh chuang hauh lo a, Darfur-ah hian mipuite chu hnehchhuh leh tihṭhaihin an la awm zui zel a ni," a ti.
Nikum chhung ri­ngawt pawh khan heng­lai bialah hian tharum thawh­na, hmeichhe chunga hleilenna, pawng­sual, tualthahna tam tak a thleng tih Cloo­ney hian a sawi lang a, "Muanna sipaite an chhuah hnu hian tuma hriat­­pui loh leh hmuhpui loh­in pawi­khawih­tuten an duh ang tawkin pawi an khawih chhun­zawm zel a ni," a ti. "Human Rights Watch ten mita hmute ngei mi 130 te thil hmuh aṭang te, dam­khaw­chhuak te phone aṭanga an kawmna aṭangtein, helai bialah hian nikum October thla tawp dawn, darkar 36 chhung ringawt khan Sudan sipaiten hmeichhia 221 zet an pawngsual a ni," tih a ziak lang.
Clooney chuan he­tianga buainain ziaawm lam a pan thei lo hi a reh theih a, muanna leh remna a awm theih nan sorkar liante chu hma la turin a nawr a, a ngen a ni. "Helai bial hi khaw­vel tan hlutna nei em em lo a nih avangin khawvel hian a ngaihthah a ni. Darfur bial ṭhen­khat leh Sudan nena an inrinaah rangkachak hmuh­chhuah a nih avangin innghir­ngho­na hi a nasa zual hle a ni," a ti bawk.