Lehkhabu bawm

Lalhmingmawii Rawite lehkhabu, 'I fate an him em?' tih chu nimin August 16, Zirtawpni khan W. Chhuanawma, MLA chuan MJA Press Club-ah a tlangzarh.

'I fate an him em?' ziaktu Lalhmingmawii Rawite hi Mizo hmeichhia zinga literature lama hnuhma ngah tak mai niin, a lehkhabu tlangzarh thar hi a kutchhuak lehkhabu pariatna a ni. Naupang lam tana ngaihnawm tak tak tur thawnthu tawi, zirtirna leh entirna ṭha tak tak nei a ni a, Bung 17 awmin a bu hi phek 162 chauha chhah a ni. Lehkhabu tlangzarh inkhawmah hian Upa Lalhmachhuana MCS (R) chuan lehkhabu thlirlawkna hun hmangin, a chhung thuziak ngaihnawm tak tak awmte sawi zauna hun a hmang. Lehkhabu tlangzarhtu W. Chhuanawma MLA chuan, "A ziaktu tur takin a ziak" tiin lawmawm a tih thu a sawi a, naupang pawhin an ngainat theih tur lehkhabu thar Zofaten kan neih belh hi a lawmawm tak zet a ni, a ti.