ṬHAZUAL FAKNA: OiC ft. Isaac Hnamte 'Fak hla mawi ri' a mawi ber

Ṭhazual Fakna chart-ah One in Christ ft Isaac Hnamte 'Fak hla mawi ri' chu pakhatna a ni a, Crosscraft ft Fiona Pachuau 'Fak hla rimawi' chu pahnihna niin Pensy 'Vengtu hmangaihna' chu pathumna a ni bawk.

Beisei leh rin lawk ang ngeiin One in Christ ft Isaac Hnamte 'Fak hla mawi ri' chu chart-ah pakhatna a rawn ni ta a, chart hmasa lamah khan pahnihna niin tunah pakhatna an rawn ni ta a, thla hnih chhung velin pakhatnaah an rawn inhlangkai der a ni.

Phil Wickham ft. Holly 'Song In My Soul' Mizo ṭawnga OiC leader Alvin-a lehlin hian YouTube lamah pawh thlir a hlawh hle a, August 4-a YouTube-a an dah aṭang khan mi nuai thum chuangin an thlirin an ngaithla tawh a, tunhnaia Fakna hla tihchhuahah chuan ngaihthlak hlawh ber pawl a ni ngei ang.

OiC-te hi chu Mizorama gospel group lar ber zinga mi an ni reng a, Phil Wickham-a hla tho 'You're Beautiful' Mizo ṭawnga letlinga thiam taka satu Isaac Hnamte an thawhpui hi an tifuh hle bawk a, chart-a No.1 an ni pawh hi a mak lo. Karleh lama an dinhmun tur hriat a chakawm tawh a, an hla hian hlut a la hlawh chho zel dawn niin a lang bawk.

Crosscraft ft Fiona Pachuau 'Fak hla rimawi' chu pahnihna a ni ve thung a, tunṭum Ṭhazual chart-ah hian pakhatna leh pahnihna hian Pathian fakna ri a mawi zia an tarlang ni berin a lang. Chart hmasaah khan pathumna niin tunah chuan a dinhmun a ṭha sawt hle a, chart lehah 'Fak hla mawi ri' hi a nek chhuak a nih pawhin thil mak a ni hran lo ang.

Ṭhazual Fakna chart top 10-a langte hi an ṭha rual ṭhin hle a, tun ṭuma mite pawh hi an ṭha rual leh tawh hle. Pathumna chu Mizo gospel singer zinga huhang ngah ber pawl Pensy 'Vengtu Hmangaihna' a ni.

Palina pawh Mizo Idol 'Grace Lalchhanhimi' a ni a, a hla 'Ka Chanchin' chu a rawn thlen sanpui leh tawh hle, top 5 khartu pawh Cindy Lalthanpuii 'Hlau Suh' kha a ni a, chart dinhmun a ngaihnawm chho hle.

Top 10-a rawn inhlangkai zingah hian Amtea, Stacy Punte leh Sawmtea-te pawh an la awm a, pakhatna dinhmun hauha mawi ṭhiau an lang a ni.

1    One in Christ ft. Isaac Hnamte     - Fak hla mawi ri

2    Crosscraft ft Fiona Pachuau     - Fak hla rimawi

3    Pensy     - Vengtu hmangaihna

4    Grace Lalchhanhimi     - Ka chanchin

5    Cindy Lalthanpuii     - Hlau suh

6    Amtea     - Engpawh thleng se

7    Sawmtea     - Hun leh ni danglam lo 

8    Stacy Punte     - Min thlahthlam ngai lo

9    Esther LR Khiangte     - Isua ka thlang

10    Zorinsanga Sailo     - A hmangaihna aw