Robert Pattinson-a'n Covid-19 a kai The Batman production chawlh leh rih a ngai

Covid-19 hripui leng vanga film industry an chawlh ṭhuap hnuah hripui lengin khawthlang lam ramah chuan ziaawm lam a pan ve deuh nia a lan avangin film industry-te chu an inhawng leh ṭan tawh a, chutih lai erawh chuan tunhnaia film production kalpui mek zinga huhang ngah ber pawl The Batman chu a changtupa ber Robert Pattinson-a'n hripui a kai tih hriatchhuah a nih avangin an film chan an chawl lailawk leh rih.

Thla eng emaw zat production an chawlh hnuah ni rei lote chiah The Batman hi an la chan chhunzawm leh a, London lamah an hmabak chhunzawma Matt Reeves leh a nau te hoin buai taka hun an hman laiin a changtupa berin hri a kai leh ta si a, kar hnih tal emaw chu production hi an chawlh leh rih a ngai dawn a ni.

Vanity Fair chuan Pattinson-a'n hri a kai tih hi a tarlang hmasa ber a, a hnuah The Holywood Reporter chuan a rawn nem nghet ve leh bawk.

Media lamin chiang takin tarlang tawh mah se Warner Bros. lam erawh chuan an la tichiang ve lo a, mahse mimal hriselna chungchang an tarlan ngai loh vanga tarlang loah an ngai. Thuchhuah an siamah erawh The Batman production chu member zingah hri kai an awm avangin kalphung pangngai an zawm a ngai si a, chawlh rih a ni tih erawh an tarlang. Hei hi Pattinson an sawinaah mi tam tak chuan an ngai.

Khawthlang lam media-te tarlan dan chuan Pattinson hi a lo berah kar hnih chhung chu inenkawlin a inkhunghran a ngai dawn.

The Batman hi March thla khan hripui leng vangin production an lo titawp lailawk tawh a, thla nga chhung lai an chawlh hnuah chhunzawm lehin harsatna dangin a tlakbuak leh ta a ni.

DC FanDome-a The Batman trailer tihchhuah khan mi tam tak a tiphur hle a, Batman fan tam tak chuan an en chak tawh thu social media lamah an sawi nasa hle. Tunah hian hmun lia ṭhena hmun khat vel chiah an la chang zo a, hemi a nih avang hian nakkum June thlaa tlangzarh an tum pawh October 1, 2021-a tlangzarh turin an sawn leh a ni.