Benioff leh Weiss-te'n Chinese novel film-ah siam dawn

Game of Thrones co-creator pahnih David Benioff leh DB Weiss chuan Chinese science fiction novel ziaktu Liu Cixin-a trilogy novel chu Netflix kaltlanga chhuah tura film-a siam an tum.

Thawlehni khan Netflix chuan Chinese science fic­tion writer Liu Cixin-a novel ziah - 'The Three-Body Problem', 'The Dark Forest' leh 'Death’s End 'chu film-a siam tum a nih thu hi an tichiang ve tawh bawk.

David Benioff leh D.B. Weiss chuan Liu Cixin novel ziahah hian kum 1960 chho vel aṭanga hun tawp lam thleng tarlan a nih thu an sawi a, mihring chanchin bakah alien civilization chanchinte pawh a awm avangin an phur hle tih an sawi.

Film-a siam an tum thu ringawt hi an la tarlang a,  a changtu turte an la tar­lang lo a, tlangzarh hun tur pawh hriat a la ni lo. An budget erawh a sang dawn hle a, $maktaduai 200 vel sen tum a nih thu Benioff, Weiss leh Netflix chuan an tarlang tawh thung a ni.