MSL Dance Battle A hmuhnawm tial tial a, an Ṭang tial tial
Vawi khat an lâm chhuak tawh a, a thawh hnihna an lâm leh mek. A hma aiin MSL Dance Battle a hmuhnawm tawh a, crew-te an ṭang tial tial a, kawng engkimah hma an sawn. Ningani leh Zirtawpni te khan battle pathum a awm a, heng battle-ah te hian point khat leha inthlauin dance crew te an chak hlawm. Battle-ah hian Myn’X, Diamond Shark leh Emerge Crew te an chak.
Ningani zana Zarkawt Serpents leh Khatla TBL inkhelah, Serpents Home crew Myn’X leh TBL away crew Lay Up te an in-battle a, heng crew pahnihte hi an battle hmasa zawka lo chak ve ve tawh an ni. An hmuhnawm hle a, a tawpah chuan point khat leka inthlauin Myn’X te hian hnehna an chang ta zawk. Myn’X hi mipa hlang niin, Lay Up lam hi hmeichhe hlang an ni thung. Props atan chair leh hrui an rawn hmang ve ve a, Myn’X hian puppets anga hrui hi hmangin, an rawn puak ṭha leh hle. Lay up lam hian whip angin an hrui te an rawn hmang thung. Chair chungah te lâmin mit a tlai hle. A tawpah point khat lekin Myn’X an chak ta a ni.
Zirtawpni tlaia Mission Veng Vikings leh Chaltlang Ryders inkhelah Vikings home crew Diamond Shark leh Ryders away crew Crazy Bee te an intum ve thung. Anni pahnih hi a hmaa lo chak lo ve ve tawh tho an ni. A hmaa an lo lâm tawh aṭanga thlirin hma an rawn sawn hle a, mahse a tawpah Diamond Shark hian hnehna an chang ta zawk. Tricks har tak tak te pawh an rawn telh nasa a, execution lamah Diamonds Shark ho hian hma an rawn hruai ta zawk.
Zirtawpni zana inkhel hmuhnawm tak Zarkawt BCA leh Tuikual South BC an inhmachhawn ṭumin, a hmaa lo chak ve ve tawh BCA home crew Emerge leh TKS Away crew Mystic Movers te an rawn inhmachhawn. Heng crew pahnihah hian mipa pathum leh hmeichhia pakhat ve ve ṭheuh an awm. Chapchar Kût te a nihna angin, Mizo theme an rawn nei a, Mizo hlaah rawn lâm telin, Zo inthuam ten an rawn inchei. An choreography-ah point khat lekin Emerge te an chak phah ta a ni.
Tun kar aṭang hian Thawhlehniah match a awm tel tawh dawn avangin Dance battle vawi li a awm dawn. Khatla TBL hian vawi thum a zawnin away an khelh avangin an away crew Lay Up te hi an rawn hah zual dawn. Naktuk zanah Lay Up hian BCA Emerge, Zirtawp zanah Chaltlang Ryders home crew Sharp Kats te an hmachhawn ang. Hei hi MSL dance battle a hmeichhe hlangin dance battle an neih vawi khatna tur a ni. Niangani zanah Tuikual South Home crew BGMX leh Serpents away crew Monadikos te an in-battle thung dawn a, Zirtawpni tlaiah Vikings home crew Diamond Shark leh BCA away crew Anonymous Signs te an che thung ang.