Biggest Rock Tour of All Time - Coldplay 'Music of the Spheres World Tour'

Coldplay-in 'Music of the Spheres World Tour' an neih mek chu Billboard history-a rock tour neih tawha sum la lut tam ber an ni tawh.

Billboard Boxscore-in a tarlan danin, Coldplay in March 2022 aṭanga an neih ṭan, 'Music of the Spheres World Tour' hian ticket mtd 8.8 hralh tawhin, an sum lak luh hi USD mtd 945.7 a tling tawh a, Elton John, U2 leh The Rolling Stones te an khum tawh a ni. “Music of the Spheres World Tour” hi Europe, Asia leh America-ah thawm a nei lian hle a, show hmabak hi 21 an la nei a, Australia leh New Zealand-ah te an la perform dawn a ni. Show an la neih tur aṭang hian an ticket sale pawh hi mtd 10 a pelh ngei rin a ni a, hei hi rock genre-ah chuan beisei phak bak a tling ang.

Rock tour hlawhtling ber ni ṭhin chu Elton John “Farewell Yellow Brick Road Tour,” kha niin, 2018 - 2023 chhungin a nei a, USD mtd 939.1 a la lut. Hemi hma hian U2’ “U2 360 Tour” chuan USD mtd 736.4 la lutin tour hi 2009-2011 chhungin an nei a, The Rolling Stones “A Bigger Bang Tour” pawh sum la lut tam ni ṭhin, 2005-2007 chhunga tour an neih aṭangin USD mtd 558 an la lut bawk a ni.