X-Men series 13-na 'The New Mutants'
Mutant hming sawia X-Men ho chiah i mitthlaah an cham a nih chuan i tisual der mai thei! Wolverine-te ṭhian ho hi mutant i hriat awmchhun an ni mial em? A lo nih hlauh chuan mutant dang hmelhriat belh turin inring rawh le.
Nimin khan United States-a theatre hrang hranga en theih turin X-Men film series 13-na, X-Men kan lo en tawh ṭhin spin-off 'The New Mutants' chu tlangzarh a ni a, comics i chhiar ngai lo a nih ngat chuan he film i en zawhah hi chuan mutant i hmelhriat belh ngei ang.
'The New Mutants'-ah hian Game of Thrones star Maisie Williams kha a chang a, Anya Taylor-Joy leh Charlie Heaton-te pawh an chang bawk. Marvel Comics chhiar ṭhinte erawh heng mutant tleirawl rualte hi an hmelhriat sa fur dawn a, tunhma deuha Cartoon Network-a X-Men: Evolution en ṭhinte pawhin an character hriat tawh sa an hmu ngei dawn bawk a ni.
Ruahmanna hmasaah chuan kum 2018 April thlaa tlangzarh tur kha an ni a, mahse harsatna neuh neuh an tawh avangin niminah khan an tlangzarh ta chauh thung a, hripui vanga theatre tam ber khar a nih laia an tlangzarh ngam erawh an fakawm hle. Box office chart aṭanga thlir chuan theatre sang khat em pawh an la tlangzarh loh laiin $maktaduai 80 lai senga an siam film an tlangzarh ngam hi an huaisen hle.
'The New Mutants' hi mutant rawlthar/tleirawl rual an ni a, Maisie Williams hi Wolfsbane lemah changin Anya Taylor-Joy hi Magik lemah a chang thung a ni. Charlie Heaton hi Cannonball lemah a chang bawk a, Cecilia Reyes, Mirage leh Sunspot character-te pawh hmuh tur an awm a, comic fan tan chuan ngaihven loh theih a ni dawn lo tih a chiang.
Nimina tlangzarh a nih hnu lawk khan dan pangngai angin critics lam an rawn inlan lehnghal a, an duhthu erawh a sam vak lo a nih hmel, he thu ziah lai hian Rotten Tomatoes-ah chuan review pakua a awm tawh a, 22% chiah rating a hmuin 3.99/10 rating a hmu tihna a ni a, Rotten Tomatoes-a X-Men film rating hmu chhe ber a ni hial.
Chhunzawmna a awm dawn em?
Film director Josh Boone leh a thawhpui Knate Lee-te chuan 'The New Mutants' hi Trilogy-a siam an tum. Kum 2017-ah daih tawh khan Boone hian Warlock leh Karma-te pawh a chhunzawmnaah chuan an lang ang tih a lo sawi tawh a, chhunzawmna siam chungchang hi vawi eng emaw zat a sawi chhuak tawh a ni. Mahse heti chung hian an siam ngei dawn em tih erawh a la chiang lo thung.