Call of Duty: Black Ops Cold War November 13-ah

Gamer-te tan thu lawmawm hriat tur dang a awm leh ta a, Call of Duty official account chuan YouTube lamah an game thar tur 'Call of Duty: Black Ops Cold War' trailer tichhuakin November 13-ah an game thar hi tlangzarh a ni dawn tih an tarlang.

'Call of Duty: Black Ops Cold War' trailer aṭang hian COD game dang ang bawkin a pui leh hle dawn tih a hriat a, gameplay footage tlem azawng an tarlang bawk. Kum 1968-1981 inkar vela thil thleng angin game hi an 'set' tih a hriat theih a, indo game nainatute tan chuan a ngaihven chi hle ang.

'Call of Duty: Black Ops Cold War' open beta chu PlayStation 4-ah a awm hmasa ber dawn a, a digital copy pre-order-te chuan an hmu hmasa dawn a ni. Game hi edition pathum a awm leh dawn a, Standard Edition- Rs. 3,999 man, Cross-Gen Bundle- Rs. 4,749 man leh Ultimate Edition- Rs. 6,249 man-te ani dawn hlawm.

Microsoft Store  chuan pre-order theihin COD thar hi an la nei lo a, PC gamer-te tan chuan Battle.net-ah a awm a nih hmel. PC game-ah hi chuan a to hlek dawn niin a lang a, Ultimate Edition hi Rs. 6,600 man vel a ni ang a, Standard Edition chu Rs. 4,400 man bawr vel a ni dawn niin NDTV chuan a tarlang a ni.