Damdawi-in khum aṭangin Katy Perry-in 'SMILE' a tlangzarh

Tunkar chu 'Raor' hitmaker tan kar duhawm leh kar chhinchhiah tlak a ni ngei dawn e. Ningani khan a pasal hual Orlando Bloom nena an fa hmasa ber, fanu duhawm tak Daisy Dove Bloom an nei hlim hlawt a; nimin khan a studio album parukna a fan-te pawhin an nghahhleh em em 'Smile' chu a tlangzarh leh bawk.

Twitter lamah chuan,"A awm tawh e! A awm ta tak tak e!!! Ka nui (Smile) hmel ka nei let leh ta e! He record hian a nuihtir che u ka beisei #SMILE chu khawi­ah pawh a awm ta e! Ka ngaina takzet che u! Enjoy (damdawi-in khum aṭanga ka thawn lol)," tiin tweet a siam a ni.

'Smile' album-a single hmasa ber 'Daisies' chu May khan a lo tichhuak tawh a, thla hmasa khan a album title hla 'Smile' chu a tichhuak leh bawk. Katy Perry album tharah hian track 12 a awm a, fan edition pali a awm bakah bonus track pahnih a dah tel bawk a ni. 'Hot n Cold' singer hian kum 2001 khan a album hmasa 'Katy Hudson' a tlangzarh a, hei hi a album dangte nena khaikhin chuan a danglam hle. Christian rock leh contemporary Christian music album a ni a, Pathian a rinna lam chungchang hlate pawh a dah nual a ni. Hetih hunlai hi chuan Katy Perry tih hming a la pu lo a,  Katy Hudson tiin mi pawhin an la hria.

Kum 2008 khan a album hmasa nena khaikhina album danglam hlak 'One of the Boys' chu Capitol Records kaltlangin a rawn tlangzarh leh a, he album aṭang hi chuan Katy Perry tih a ni ta a, a hlate erawh a gospel ta lo hle a, 'I Kissed a Girl' tihte a rawn ni nawk ta hlawm. Mahse he album avang hian khawvel chuan a hre ta hle a, grammy nomination pahnih lai a hmuh bakah khawvel pumah copy maktadui sarih chuang tehmeuh a hralh a, 'I Kissed a Girl' phei hi chu  Billboard Hot 100 number-one-te hial a nihpui ta a; keini ram thleng thleng pawhin kan lo hre ve ta a nih hi.

Hemi hnu lama a album tlangzarte hi chu 'hit' tura ngaihsa a ni tawh a, 'Teenage Dream' album kha US Billboard 200 chart-ah tlangzarh a nih karah No.1 a nihpui nghal a, 'Prism' pawh kha chutiang dinhmun bawk chu thlenpui lehin 'Witness' pawh kha No.1 a nihpui leh a ni. Hemi a nih avang hian 'Smile' pawh hi hralh kal leh hle tura beisei a ni.