Box Office : 'Deadpool & Wolverine' chungah 'Alien: Romulus'

"Alien" franchise seventh installment, "Alien: Romulus" chuan North American box office-ah "Deadpool & Wolverine" nek chhuakin a chung ber dinhmun a rawn hauh.

Sci-fi/horror-thriller hian tlangzarh karah USD mtd 41.5 la lutin,international-a a sum lak luhte nen a kar khatnaah hian USD mtd 108.2 a la lut thei a ni. Director Feder Alvarez chuan original 'Alien' film director, Ridley Scott-an a thlawp ṭhat em avangin a chungah a lawm hle tih a sawi.

Thawm nei lian, "Deadpool & Wolverine" chu No 2-ah tla thlain USD mtd 29 a la lak luh belh tho a, khawvela R-rated movie zinga sum la lut tam ber ni tawhin, a sum hmuh chhuah hi USD tld 1.1 a tling tawh a ni. Blake Lively channa, "It Ends With Us" chu pathumnaah a chhuk thla ve bawk a, a kar hnihnaah hian USD mtd 24 la lutin, khawvel pumah USD mtd 180 a la lut tawh a ni. "Twisters" pawh a la che ṭha zel a, kar nganaah pawh UDS mtd 9.8 la lutin palina a la hauh thei.

2009 stop-motion animated film "Coraline" chu a kum 15-na pualin release nawn leh a ni a, USD mtd 8.6 la lutin Top 5-ah a la lang pha a ni. Top 10-a lang dangte chu "Despicable Me 4" (USD mtd 6), "Trap" (USD mtd 3.43), "Inside Out 2" (USD mtd 3.2), "Stree 2" (USD mtd 2.6) leh "Borderlands" (USD mtd 2.4) te an ni.