'Snow White' boruak a ṭha lo

Movie chhuak thar tur zinga ngaihven hlawh, 'Snow White' siam thar leh chu a changtute pahnih, Rachel Zegler leh Gal Gadot-ten Israel-Palestinian buaina thleng meka an ngaihdan a in ang lo avangin boruak a ṭha lo a, a release hun thleng nghawng a neih mai a hlauhthawnawm nia sawi a ni.

He movie-ah hian kum 23 mi, Rachel Zegler hi Snow White-ah changin, kum 30 mi Gal Gadot hi Evil Queen-ah a chang a ni. Gal Gadot hi Israel mi niin, Israel-Palestinian buaina thleng mekah Israel a ṭanna thu hi a sawichhuak fo a, hetih lai hian Rachel Zegler hian kum 2021 aṭang khan Palestinian lam ṭangin an tan a lo ṭawngchhuak fo tawh bawk. Tuna Gaza Strip-a buaina thleng mekah pawh Palestinian mite zalenna pek a thlawp tiin thuchhuah pawh a siam fo a ni. Changtute pahnih inkara ngaihdan inmil lo leh, ṭan lam nei a an ṭawng chhuah ṭhin hian Israel leh Palestine thlawptute inkarah pawh lungawi lohna a thlen a, 'Snow White' boycott an duh thute pawh an sawi.

Israel-Palestinian chung-chang bakah, he movie-a Snow White lema chang tura Latina actress, Zegler hman a ni hi mi tam tak an lungawi lo bawk. Snow White chanchin sawinaa vur ang maia vun ngo/var tih anih laia Zegler hman a ni hi a inhmeh lo an ti a, hei bakah mi te, dwarf-te aia CGI character hman a ni chu an sawisel nasa bawk.

'Snow White' reboot hi Marc Webb direct niin, budget hi USD mtd 330 a ni. A tirah chuan kumin March thlaa tlangzarh tura ruahman kha a ni a, mahse sawiselna leh inhnialna hrang hrang a awm chhoh avangin March, 2025-a tlangzarh tura sawn hlat a ni ta a ni. An ruahman hunah pawh hian tlangzarh theih a ni ngei dawn em tih pawh sawilawk a harsa rih a ni.