Mizoramah phengphehlep thar hmuchhuak

Mizoram University, Zoology Department-a Assistant Professor Dr. Esther Lalhmingliani leh Berlin Museum of Natural History, Germany-a a thawhpui Dr.Stefan Naumann-te chuan tun hnai khan Mizoramah phengphehlep (maimaw phengphehlep) chi thar an hmuchhuak. 

He phengphehlep chi thar an zirchianna hi science magazine BIONOTES-ah December 28, 2019 khan tarlan a ni a, Mizoram hmingchawitir in, a scientific name ah Salassamizorama an vuah nghe nghe. Heng phengphehlep hi an zirchianna atan a pa chiah hmuh a la ni a, a nu leh a pangang awm dan hi hmuh leh zirchian a la ni lo thung.

Maimaw phengphehlep hi sap ṭawnga silk moth an tih hi an ni a, an dam chhung hun rei zawk pangang (maimaw pangang) anga an hman hnuin inthlah pung turin phengphehlepah an rawn chang ṭhin a ni. Phengphehlepa an chan hnu hian kar hnih vel chiah an dam tawh a, hemi hunchhung hi chuan engmah an ei tawh ngai lo.

Zirchian chinah, Mizoramah hian mamaw phengphehlep (silk moth) chi 17 vel a awm a, heng maimaw phengphehlepte hi mawi tak takte pawh an awm a, kan pi lehpute'n hmuh thiang lo an tih zinga mi “Keptuam” pawh hi maimaw phengphehlep chi a ni.