Blurred Lines buaina a fel Thicke ten USD mtd7.3 an pe dawn

Robin Thicke-a hla hit, Pharrell Williams leh T.I. te nena an sak Blurred Lines buaina chu chinfel a ni ta a, Robin Thicke te duh loh zawngin thutlukna siam a ni a, USD mtd7.3 an chawi ang.

Thawhlehni khan Los Angeles court chuan thutlukna a siam a, Robin Thicke hian a hla hit, Blurred Lines hi kum 1977-a Marvin Gaye hla hit Got To Give It Up aṭanga a siam nia ngaiin dan bawhchhiaah a puh a ni. Court chuan Thicke leh Williams te hnenah hian USD mtd7.3 chu Gaye tu leh fate hnena pe turin a ti a ni.

Court-ah hian Thicke chuan Blurred Lines a phuah lai hian soul singer lar ṭhin Marvin Gaye hla hit, Got To Give It Up hla hi a ngaihtuahnaah a awm lo hrim hrim tih a sawi rualin, Gaye hi a ngaisang hle tih a sawi a, amah inspire-tu ber zawk chu Miley Cyrus niin a sawi daih bawk. Thicke chuan, "Miley nen hian country music ṭhenkhat kan khawih dun a, he ka hla hi country music, tlema a tempo up si a ni ber," a ti.

Blurred Lines hla hi Pharrell Williams nena an ziah a ni a, kum 2012 kum laihawl vela an phuah a ni. Williams pawh hian he hla an phuah lai hian Gaye hla a rilruah a lang lo tih a sawi bawk.

Marvin Gaye fate - Frankie leh Nona te hian Blurred Lines an ngaihthlak hian an pa hla nen a inang hlein an hria a, an ngaithla chiang a, an copy ngei nia an ngaih takah chuan court-ah hian thu an thlen ta a ni. A tira court-a an thu thlenah tak chuan an pa hla an lo lak chhawn ve rikngawt avangin USD mtd25 chawi turin an phut a ni.

Frankie leh Nona te hian musicologist an ruai a, uluk takin Blurred Lines hi an ngaithla chiang a ni. Musicologist chuan inanna tam tak a hmuchhuak a, heng hla pahnihahte hian element lian tak tak, inang chiah chiah pariat lai a awm tih a sawi a, bass, keyboard leh hook te a inang chiah niin a sawi.

Court thutluknaah hian T.I. a awl hlauh a, ani hi chuan engmah pawisa a chawi dawn lo a ni.

Court kar hnih chhung zet he thubuai hi a ngaihtuah hnuah thutlukna hi a siam ta a ni. Court thutluknaah hian rapper T.I. erawh a awl hlauh a, ani hi chu hla phuahtu leh music siamtu zingah tel loin zai zinga a tel chauh vangin court hian pawi sawiah a ngai lo a ni.