Naupang talent nei ṭha zawnna SBI Life - Little Mizo Champs

'India's got talent' en ṭhin tan chuan thil thar a ni lo ang - March 18 & 19, 2015 hian Chanmari YMA Hall-ah 'SBI Life - Little Mizo Champs' buatsaih a ni dawn. Naupang kum sarih aṭanga kum 15 inkar tan talent phochhuahna hun siam a ni dawn a, lawmman ṭha tak tak a awm ang.

Naupang zinga talent nei ṭhate inphochhuahna tur programme-ah hian a tel apiangin minute nga chhung hun an nei ang. Hetah hian zaithiam tan chuan zai mai tur a ni a, lam thiam tan a lam thei a, musical instrument a tum theih a, recitation sawi thiam tan sawi mai tur a ni a, minute nga chhungin mahni thiam ang apiang lantir tur a ni ang.

Mimala inlan duh tan a inlan theih a, pawl (group) ang pawhin a inlan theih. Ṭhianhoa zai a theih a, ṭhianhoa lam a leng a, ṭhianhoa thiamthil dang (martial arts pawh a theih vek) show pawh a leng vek a ni. Sikul chawlh lai a ni a, naupangin an thiam thil eng pawh an lantir theihna hun a ni - a duh tan chuan inchei danglama inlan (cosplay leh a kaihhnawih thil) thlengin a leng vek.

Minute nga chhunga an thiamthil lantir hi judge-te'n uluk takin an lo en ang a, a tawpah a tiṭha ber hnenah lawmman an pe mai dawn a ni. Tel tura sawm bik an awm lo a, March 18 zing dar 9:00-ah Chanmari YMA Hall-ah kalin a hmunah registration tih nghal tur a ni. Registration tih man pawisa pek a ngai lo a, a tel tur an tam deuh chuan a kal hmasa apiang lak hmasak an ni ang.

He Little Mizo Champs hi TV-a tihchhuah leh tur a ni a, Zonet TV lamin an cover vek dawn a; Zoram khawvel mi hriat judge ṭha tak takin an vil dawn bawk a ni.