Billboard 200: Kar 15 chhung No 1 ni thei 'Tortured Poets Department'

Artist lar album ti chhuak thar awm nual mah se, Billboard 200 album chart-a No 1 aṭanga Taylor Swift "The Tortured Poets Department" nek chhuak thei an awm hlei thei lo. Swift album hnuhnung ber hi a zawn loin kar 15 chhung No 1 a ni ta.

Kum 34 mi, superstar Swift hian "The Tortured Poets Department" hi tlangzarh aṭangin a zawnin kar 12 chhung No 1 a nihpui a, Eminem-a'n kar khat chhung a luahlan hnuah No 1-ah bawk rawn kir lehin, kar 15 chhung No 1 dinhmun hi a hauh zui a ni. Kar liam ta khan US-ah equivalent album unit 85,000 nei lehin, a hla 31 te chuan on-demand official stream mtd 74.77 an nei leh bawk. Album sales hi 28,000 a la nei tling thei bawk a ni.

Chappell Roan debut solo album "The Rise and Fall of a Midwest Princess" chu No 3 aṭangin No 2-a a rawn chho a, June thla tawp lam aṭang khan Top 10-ah hian langin hma a rawn sawn chho zel a ni. Morgan Wallen "One Thing at a Time" pawh No 3-ah a lang leh a, March 2023-a tih chhuah daih tawh ni mah se, chart-ah a lanpui chhunzawm reng a ni. Billie Eilish "Hit Me Hard and Soft" chu No 5-ah langin, equivalent album unit 57,000 a nei.